డీలిమిటేషన్, మహిళా రిజర్వేషన్ బిల్లులను కేంద్రం వాయిదా వేసినట్లు సమాచారం

డీలిమిటేషన్, మహిళా రిజర్వేషన్ బిల్లులను కేంద్ర ప్రభుత్వం ప్రస్తుతానికి పక్కన పెట్టినట్లు సమాచారం. పార్లమెంట్ వర్షాకాల సమావేశాల్లో ఈ బిల్లులను ఆమోదింప చేయాలని కేంద్రం భావించినా, ఊహించని రాజకీయ పరిణామాలతో నిర్ణయం వాయిదా పడిందని వర్గాలు తెలియజేస్తున్నాయి.

బిల్లుల ఆమోదం కోసం కేంద్రం పశ్చిమ బెంగాల్ లోని TMC తిరుగుబాటు MP లు, మహారాష్ట్రలోని శివసేన తిరుగుబాటు MP ల మద్దతును కూడగట్టి, శరద్ పవార్ తో చర్చలు జరిపింది. అయితే ఢిల్లీ లోని జంతర్ మంతర్ వద్ద NEET పేపర్ లీక్ వ్యతిరేక నిరసనలు ఉధృతం కావడంతో పరిస్థితులు మారాయి. కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయాల్సి వచ్చింది. విద్యార్థులపై లాఠీ చార్జ్ వివాదంతో ప్రతిపక్షాలు పార్లమెంట్ ను స్తంభింపజేశాయి. లాఠీ చార్జ్ కు ఆదేశాలు ఎవరిచ్చారో హోమ్ మంత్రి అమిత్ షా సమాధానం చెప్పాలని డిమాండ్ ఉధృతమైంది.

ఈ నేపథ్యంలో కేంద్రం కీలక బిల్లులను ముందుకు తీసుకెళ్లడం కష్టమని భావించి వాయిదా వేసినట్లు తెలుస్తోంది. వచ్చే వారం పార్లమెంట్ ఎజెండాలో డీలిమిటేషన్, మహిళా రిజర్వేషన్ బిల్లులు లేవని సమాచారం. FCRI వికసిత్ భారత్ శిక్ష అధిష్టాన్ బిల్లు సహా మరికొన్ని బిల్లులను కూడా వాయిదా వేయాలని కేంద్రం ఆలోచిస్తున్నట్లు తెలిసింది.

అయితే సుప్రీంకోర్టు న్యాయమూర్తుల సంఖ్య 34 నుంచి 38కి పెంచే బిల్లు, ఇండియన్ స్టాటిస్టికల్ ఇన్స్టిట్యూట్ బిల్లు, బ్యాంకర్స్ బుక్ ఎవిడెన్స్ బిల్లు, ఆదాయపు పన్ను చట్ట సవరణ వంటి బిల్లులను పార్లమెంట్‌లో ప్రవేశపెట్టాలని కేంద్రం యోచిస్తున్నట్లు సమాచారం. పార్లమెంట్ సమావేశాలను త్వరలోనే నిరవధికంగా వాయిదా వేసే అవకాశం ఉందని అధికార వర్గాలు తెలిపాయి.