SC, ST రిజర్వేషన్లకు క్రీమీ లేయర్ వర్తించదని కేంద్రం సుప్రీంకోర్టుకు తెలిపింది

SC, ST రిజర్వేషన్లకు క్రీమీ లేయర్ సూత్రం వర్తించదని కేంద్ర ప్రభుత్వం సుప్రీంకోర్టుకు తెలిపింది. ఈ మేరకు దాఖలైన ప్రజా ప్రయోజన వ్యాజ్యానికి (PIL) సమాధానంగా కేంద్రం అఫిడవిట్ దాఖలు చేసింది.

న్యాయవాది అశ్వినీ ఉపాధ్యాయ, రామశంకర్ ప్రజాపతి తరఫున దాఖలైన పిటిషన్‌లో SC, ST రిజర్వేషన్లలో కూడా క్రీమీ లేయర్ విధానాన్ని అమలు చేయాలని కోరారు. ఓబీసీలలో ఆర్థికంగా, సామాజికంగా, విద్యాపరంగా వెనుకబడిన వారికే రిజర్వేషన్లు ఇస్తున్నారని, అదే తరహాలో SC, ST వర్గాలకు కూడా క్రీమీ లేయర్ తీసుకురావాలని పిటిషనర్లు వాదించారు.

అయితే, ఈ వాదనను కేంద్రం తోసిపుచ్చింది. అశోక్ కుమార్ ఠాకూర్ vs యూనియన్ ఆఫ్ ఇండియా కేసులో సుప్రీంకోర్టు రాజ్యాంగ ధర్మాసనం ఇదివరకే SC, ST రిజర్వేషన్లకు క్రీమీ లేయర్ వర్తించదని స్పష్టం చేసిందని కేంద్రం అఫిడవిట్‌లో పేర్కొంది. ప్రభుత్వ ఉద్యోగాల రిజర్వేషన్లలో మరింత సమానత్వ విధానాలు రూపొందించాలని కేంద్రాన్ని ఆదేశించాలన్న పిటిషనర్ల సూచనను కూడా కేంద్రం వ్యతిరేకించింది. ఈ పిటిషన్‌లను తిరస్కరించాలని సుప్రీంకోర్టుకు విజ్ఞప్తి చేసింది.