సాయంత్రానికి 100 శాతం కరెంట్ ఇస్తామన్న CM చంద్రబాబు

తుఫాను ప్రభావిత ప్రాంతాల్లో విద్యుత్ స్తంభాలను మళ్లీ నిలబెడుతున్నామని, ఈరోజు సాయంత్రానికి 100 శాతం కరెంట్ ఇస్తామని ముఖ్యమంత్రి చంద్రబాబు నాయుడు తెలిపారు. కోనసీమ, పశ్చిమ గోదావరి జిల్లాల్లో ఒకటి రెండు ప్రాంతాలను మినహాయించి మిగిలిన చోట్ల కరెంట్ పునరుద్ధరణ పూర్తవుతుందని ఆయన చెప్పారు.

రోడ్లపై పడిన చెట్లను నిన్నటి నుంచి తొలగిస్తున్నామని CM తెలిపారు. మారుమూల ప్రాంతాలకు వెళ్లే మార్గాల్లో ఎలాంటి అడ్డంకులు లేకుండా రోడ్లను క్లియర్ చేశామని ఆయన చెప్పారు. ఈ పనులను తాను నిన్నటి నుంచి పర్యవేక్షిస్తున్నట్టు పేర్కొన్నారు.

రాష్ట్రంలో 15 వేల విద్యుత్ స్తంభాలు పడిపోతాయని భావించినప్పటికీ, కోనసీమలోనే సుమారు 8,000 స్తంభాలు పడిపోయాయని ఆయన తెలిపారు. ఎక్కువ నష్టం పశ్చిమ గోదావరి జిల్లాలో జరిగిందని చెప్పారు. రాష్ట్రంలోని అన్ని జిల్లాల్లో విద్యుత్ స్తంభాలను మళ్లీ అమర్చే పనులు జరుగుతున్నాయని ఆయన వివరించారు.

టెలికమ్యూనికేషన్ విభాగంలో కొన్ని ఇబ్బందులు తలెత్తాయని CM తెలిపారు. జనరేటర్లు, డీజిల్ సిద్ధంగా ఉంచుకుంటే ఇబ్బందులు తగ్గుతాయని ఆయన సూచించారు. అవసరమైతే డీజిల్ ఖర్చును ప్రభుత్వమే భరిస్తుందని, ప్రజలకు నష్టం ఉండకూడదని అధికారులకు చెప్పినట్టు పేర్కొన్నారు.

సహాయ పనుల కోసం తెలంగాణ ప్రభుత్వాన్ని సంప్రదించామని చంద్రబాబు తెలిపారు. 1,000 మంది సిబ్బందిని పంపాలని కోరినట్టు ఆయన చెప్పారు. తెలంగాణ ప్రభుత్వం సిబ్బందిని పంపిస్తామని తెలిపినట్టు ఆయన వివరించారు.