పవన్ కళ్యాణ్ డిశ్చార్జి రెండు, మూడు రోజుల్లో: సీఎం చంద్రబాబు

ముంబైలో కుడిభుజం శస్త్రచికిత్స చేయించుకున్న ఏపీ డిప్యూటీ సీఎం పవన్ కళ్యాణ్ ఆరోగ్యం నిలకడగా ఉన్నట్లు వైద్యులు ప్రకటించారు. రెండు, మూడు రోజుల్లో ఆయన ఆస్పత్రి నుంచి డిశ్చార్జి అవుతారని ఏపీ సీఎం చంద్రబాబు నాయుడు సందర్శన అనంతరం తెలిపారు.

ముంబైలోని కోకిలాబెన్ ధీరూభాయ్ అంబానీ హాస్పిటల్లో పవన్‌కు రొటేటర్ కఫ్ సమస్యకు ఆర్థోస్కోపిక్ విధానంలో శస్త్రచికిత్స జరిగింది. కుడిభుజ ఎముకలోని గ్రేటర్ ట్యూబరోసిటీ భాగంలో ఫ్రాక్చర్ ఉండడంతో పాటు రెండు ప్రధాన టెండాన్లు చిట్లినట్లు వైద్యులు నిర్ధారించి సుమారు మూడున్నర గంటలపాటు ఆపరేషన్ నిర్వహించారు. శస్త్రచికిత్స విజయవంతమైందని ప్రకటించిన వైద్యులు పూర్తిస్థాయిలో కోలుకోవడానికి నాలుగు నెలల సమయం పట్టొచ్చని అంచనా వేశారు.

సీఎం చంద్రబాబు పవన్‌ని పరామర్శించారు. చిన్న నొప్పులను పట్టించుకోకపోవడం వల్లే ఈ సమస్య తీవ్రమైందని ఆయన అన్నారు. పవన్ వేగంగా కోలుకుంటున్నారని, కొన్ని రోజులు విశ్రాంతి తీసుకోవాలని సూచించినట్లు చెప్పారు. ఎడమ భుజంలో కూడా చిన్న సమస్య ఉన్నట్లు వైద్యులు గుర్తించారని, కేవలం ఫిజియోథెరపీతో సరిపోదని, మరింత చికిత్స అవసరమని తెలిపారు.

గతంలో మే 15న జరిగిన పార్టీ కార్యకర్తల సమావేశంలో పవన్ మాట్లాడుతూ, అభిమానులు చేయి పట్టుకుని లాగడం వల్లే భుజం సమస్య మొదలైందని చెప్పారు. ప్రస్తుతం ఆయన ఆస్పత్రిలో కోలుకుంటున్నారు.