చార్ధామ్ యాత్ర మరోసారి నిలిచిపోయింది: భారీ వర్షాలతో రెండు రోజుల తాత్కాలిక నిలిపివేత

ఈ నెల రెండవ వారంలో ప్రతికూల వాతావరణం కారణంగా నిలిచిపోయిన చార్ధామ్ యాత్ర, తిరిగి ప్రారంభమైన కొద్ది రోజులకే మళ్లీ నిలిచిపోయింది. ఉత్తరాఖండ్‌లో కురుస్తున్న భారీ వర్షాలు, కొండచరియలు విరిగిపడే ప్రమాదం నేపథ్యంలో అధికారులు రెండు రోజుల పాటు యాత్రను తాత్కాలికంగా నిలిపివేశారు.

బద్రీనాథ్, కేదార్‌నాథ్ లలో ప్రస్తుత పరిస్థితులు ప్రమాదకరంగా ఉన్నాయి. రాష్ట్రవ్యాప్తంగా భారీ వర్షాలు కురవడంతో యాత్రా మార్గాల్లో పలుచోట్ల కొండ చర్యలు విరిగిపడి రోడ్లు దెబ్బతిన్నాయి. భక్తుల భద్రత దృష్ట్యా మొత్తం యాత్రను నిలిపివేసినట్లు అధికారులు తెలిపారు.

ప్రస్తుతం యాత్రలో ఉన్న భక్తులు సురక్షిత ప్రాంతాలు, బేస్‌క్యాంప్‌లకు పరిమితం కావాలని అధికారులు విజ్ఞప్తి చేశారు. కొండ ప్రాంతాల్లో అనవసర ప్రయాణాలు చేయొద్దని, నదులు, వాగుల వద్దకు వెళ్లొద్దని స్థానికులకు, పర్యాటకులకు హెచ్చరికలు జారీ చేశారు.

వాతావరణం మెరుగయ్యాక, యాత్రా మార్గాలు సురక్షితమని ధృవీకరించిన తర్వాతే యాత్ర పునరుద్ధరిస్తామని అధికారులు స్పష్టం చేశారు. యాత్రకు బయలుదేరాలని భావించే భక్తులు ప్రయాణాలను వాయిదా వేసుకోవాలని సూచించారు.