చార్మినార్ భాగ్యలక్ష్మి ఆలయంలో కాయిన్ పంపిణీకి భారీ రద్దీ

హైదరాబాద్‌లోని చార్మినార్ ప్రాంతంలో ఉన్న భాగ్యలక్ష్మి అమ్మవారి ఆలయంలో కాయిన్ పంపిణీ కోసం భారీ రద్దీ నెలకొంది. నిన్న రాత్రి నుంచి ఈ పంపిణీ మొదలైంది.

ఆలయ అధికారుల ప్రకారం మూడు రోజుల పాటు ఖజానా పంపిణీ కొనసాగుతుంది. అమ్మవారి ప్రసాదంగా భావించే ఈ కాయిన్ల కోసం నగరంలోని వివిధ ప్రాంతాల నుంచి భక్తులు ఆలయానికి వస్తున్నారు. ప్రతి ఒక్కరికీ కాయిన్ అందుతుందని అధికారులు తెలిపారు.

ఆలయం వద్ద క్యూ లైన్ సుమారు 500 మీటర్ల వరకు కొనసాగుతోంది. ఎండను లెక్కచేయకుండా భక్తులు వరుసలో నిలబడి వేచి ఉంటున్నారు. మేడ్చల్, సీతాఫల్‌మండి, హిమాయత్ నగర్, కార్వాన్, గోల్కొండ తదితర ప్రాంతాల నుంచి భక్తులు వచ్చినట్లు తెలిపారు. కొందరు రెండు గంటల పాటు లైన్‌లో నిలబడినట్లు చెప్పారు.

గత ఏడాదితో పోలిస్తే ఈసారి నాలుగు రెట్లు ఎక్కువ మంది భక్తులు వచ్చారని కొందరు తెలిపారు. చార్మినార్ ప్రాంతం సెన్సిటివ్ ఏరియా కావడంతో పోలీసులు భారీ బందోబస్తు ఏర్పాటు చేశారు.

భక్తుల విశ్వాసం ప్రకారం ఈ కాయిన్ ఇంట్లో ఉంచుకుంటే సానుకూల శక్తి ఉంటుందని, ఆరోగ్యం, సిరిసంపదలు మెరుగవుతాయని నమ్ముతారు. ఈ కాయిన్ పంపిణీ మూడు రోజుల పాటు కొనసాగుతుందని ఆలయ అధికారులు తెలిపారు.