అమర్నాథ్ యాత్ర: చారీ ముబారక్ శ్రీనగర్ నుంచి పహల్గాంకు పవిత్ర యాత్ర ప్రారంభం

అమర్నాథ్ యాత్రకు ప్రతీక అయిన చారీ ముబారక్ (పవిత్ర గద) శ్రీనగర్‌లోని దశ్నామి అఖాడా నుంచి పహల్గాంకు బయలుదేరింది. ఆషాఢ పూర్ణిమ సందర్భంగా ఈ సంప్రదాయ యాత్ర ప్రారంభమైంది. ఈ సందర్భంగా పహల్గాంలో భూమి పూజ, నవగ్రహ పూజ, ధ్వజారోహణం వంటి ధార్మిక కార్యక్రమాలు నిర్వహించనున్నారు. అనంతరం మార్తాండ్‌లో చారీ ముబారక్‌కు స్నానం, పూజాదికాలు జరిపి సాయంత్రం తిరిగి శ్రీనగర్‌కు చేరుకుంటారు.

ప్రస్తుత సీజన్‌లో ఇప్పటికే 4,25,000 మంది భక్తులు అమర్నాథ్ ఆలయాన్ని దర్శించుకుని సురక్షితంగా స్వగ్రామాలకు చేరుకున్నారని అధికారులు వెల్లడించారు. ప్రతికూల వాతావరణ పరిస్థితులు ఉన్నప్పటికీ, రోజుకు సగటున 17 నుంచి 18 వేల మంది భక్తులు దర్శించారని తెలిపారు. శ్రావణ మాసం ప్రారంభం కావడంతో రాబోయే రోజుల్లో మరింత ఎక్కువ మంది భక్తులు వస్తారని భావిస్తున్నారు.

చారీ ముబారక్ యాత్ర సందర్భంగా ప్రధాన అర్చకులు స్వామి దీపేంద్ర గిరి మాట్లాడుతూ, ‘సర్వే భవంతు సుఖినః, సర్వే సంతు నిరామయాః’ అనే మంత్రంతో అందరి శ్రేయస్సు కోసం ప్రార్థిస్తామన్నారు. రాష్ట్రంతో పాటు దేశంలో శాంతి, సంపద కోసం కూడా ప్రార్థించనున్నట్లు తెలిపారు.