చైనా ప్రతిపాదించిన మయన్మార్-బంగ్లాదేశ్ కారిడార్, భారత్‌ను దాటవేత

బంగ్లాదేశ్ ప్రధాన మంత్రి ఇటీవలి చైనా పర్యటనలో భాగంగా చైనా-మయన్మార్-బంగ్లాదేశ్ ఆర్థిక కారిడార్ ప్రాజెక్టును వేగవంతం చేయాలని ఇరు దేశాలు నిర్ణయించాయి. ఈ మార్గం భారత్‌ను దాటవేస్తూ చైనాకు బంగాళాఖాతం వైపు నేరు ప్రవేశం కల్పిస్తుంది.

చైనాలోని కున్మింగ్ నగరం నుంచి బయలుదేరే ఈ కారిడార్ మయన్మార్ లోని మండలే మీదుగా రాఖినే రాష్ట్రంలోని క్యవ ప్యూ ఓడరేవుకు చేరుతుంది. అక్కడి నుంచి బంగ్లాదేశ్ లోని చిట్టగాంగ్, కాక్స్ బజార్ నౌకాశ్రయాలకు అనుసంధానం అవుతుంది. దీని ద్వారా చైనా వస్తువులతో పాటు నౌకాదళ ఉనికి కూడా భారత్‌కు సమీపంలో పెరిగే అవకాశం ఉంది.

గతంలో ప్రతిపాదించిన బంగ్లాదేశ్-చైనా-భారత్-మయన్మార్ (బీసీఐఎం) కారిడార్‌పై భారత్ అభ్యంతరం వ్యక్తం చేయడంతో 2019లో చైనా దాన్ని బెల్ట్ అండ్ రోడ్ ఇనిషియేటివ్ జాబితా నుంచి తొలగించింది. ఇప్పుడు ఆ మార్గం స్థానంలో భారత్‌ను కాకుండా కొత్త రూట్‌ను సిద్ధం చేసింది. చైనా బంగ్లాదేశ్ రాయబారి యావో వెన్ మాట్లాడుతూ, పాత ప్రాజెక్టు ఆశించిన ఫలితాలు ఇవ్వలేదని, అయితే భారత్ కోరుకుంటే ఇందులో చేరవచ్చని తెలిపారు.

బంగ్లాదేశ్ విదేశాంగ మంత్రి ఖలీలూర్ రెహ్మాన్ స్పందిస్తూ, ఈ ప్రతిపాదనపై ఇంకా తుది నిర్ణయం తీసుకోలేదని, మయన్మార్ లోని రాఖినే రాష్ట్రంలో శాంతి నెలకొన్నాకే ముందుకు వెళ్తామని చెప్పారు. ఆ ప్రాంతంలో కొనసాగుతున్న అంతర్యుద్ధం వల్ల ఈ మార్గం నిర్మాణం సవాలుతో కూడుకున్నదని అంతర్జాతీయ విశ్లేషకులు భావిస్తున్నారు.

పశ్చిమాన భారత్ వ్యతిరేకిస్తున్న చైనా-పాకిస్తాన్ ఎకనామిక్ కారిడార్ తరహాలో తూర్పున ఈ కొత్త కారిడార్ ను అమలు చేస్తే, భారత్‌కు రెండు వైపులా చైనా ప్రభావం పెరిగే ప్రమాదం ఉందని నిపుణులు అభిప్రాయపడుతున్నారు. ఇదే పర్యటనలో చైనా, బంగ్లాదేశ్ ల మధ్య నదీ నిర్వహణ, వరద నియంత్రణ, డిజిటల్ రంగంలో పలు ఒప్పందాలు కుదిరాయి. బంగ్లాదేశ్ ఒకే చైనా విధానానికి మద్దతు తెలిపింది.