చైనా రియల్ ఎస్టేట్ మాంద్యం: ఫర్నిచర్, పెయింటింగ్ రంగాల్లో ఉద్యోగాల నష్టం

చైనాలో రియల్ ఎస్టేట్ మార్కెట్ తీవ్రమైన మాంద్యాన్ని ఎదుర్కొంటోంది. ప్రజలు తమ ఆదాయంలో 70% పైగా ఇళ్లపై పెట్టుబడి పెట్టారు. ప్రభుత్వం రియల్ ఎస్టేట్‌ను ప్రోత్సహించింది. అయితే ఇప్పుడు కొనుగోలుదారులు తగ్గడంతో కొత్త ఇళ్ల నిర్మాణాలు, విక్రయాలు డబుల్ డిజిట్ మైనస్‌లో పడిపోయాయి.

ఈ పతనం ఫర్నిచర్, పెయింటింగ్, డిజైనింగ్ వంటి 50 దాకా అనుబంధ రంగాలపై ప్రభావం చూపింది. ఉత్తర చైనాలోని ఫర్నిచర్ మార్కెట్ ఖాళీగా మారింది. కొన్ని పెద్ద బ్రాండ్లు కార్మికులకు జీతాలకు బదులు తమ సరుకునే ఇస్తున్నాయి. ఇంటీరియర్, పెయింటింగ్ నిపుణులు ఏడాదిలో కేవలం 15 రోజులు మాత్రమే పని దొరుకుతోందని ఆవేదన వ్యక్తం చేస్తున్నారు.

డిజైన్ సంస్థలు వేలాదిగా మూతపడ్డాయి. సీనియర్ ఇంజనీర్లు డెలివరీ ఉద్యోగాలు చేయాల్సిన పరిస్థితి ఏర్పడింది. సిమెంట్, స్టీల్ పరిశ్రమలు కూడా దెబ్బతిన్నాయి. ఉత్పత్తి ఖర్చు కంటే అమ్మకం ధర తగ్గడంతో అనేక ఫ్యాక్టరీలు మూసివేసి కార్మికులను ఇంటికి పంపిస్తున్నాయి.