చైనా రహస్య నిఘా వ్యవస్థ బయటపడింది: విదేశీయుల డేటాబేస్ లీక్

సైబర్ సెక్యూరిటీ పరిశోధకుడు మార్క్ హోఫర్ ఒక వెబ్‌సైట్‌లో సెర్చ్ చేస్తుండగా చైనా నిఘా వ్యవస్థకు సంబంధించిన ఒక రహస్య డేటాబేస్ కనుగొన్నారు. ఓవర్సీస్ పర్సనల్ కోసం డైనమిక్ కంట్రోల్ ప్లాట్‌ఫామ్ అనే ఈ వెబ్‌సైట్‌లో విదేశీయుల వ్యక్తిగత వివరాలు భారీగా నిల్వ ఉన్నాయి.

ఈ డేటాబేస్ లో ఫొటోలు, పాస్‌పోర్ట్ నంబర్లు, పాత మొబైల్ నంబర్లు, గ్యాస్ బిల్లులు, ఆసుపత్రి సందర్శనలు, స్కీయింగ్ ట్రిప్ లాగ్స్ వంటి వివరాలు ఉన్నాయి. చైనాలోని 140 కోట్ల మంది పౌరులతో పాటు విదేశీయులను కూడా ఈ నిఘా వ్యవస్థ ట్రాక్ చేస్తున్నట్టు తేలింది.

ఈ వెబ్‌సైట్ బీజింగ్ కు చెందిన ఒరిజిన్ డైనమిక్ అనే సంస్థతో అనుసంధానం అయి ఉండగా, ఈ సంస్థ చైనా పోలీస్ నిఘా విభాగంతో కలిసి పనిచేస్తున్నట్లు మీడియా కథనాలు పేర్కొంటున్నాయి. అసోసియేటెడ్ ప్రెస్ పరిశోధన ప్రకారం, చైనా కనీసం 150 దేశాలకు నిఘా సాంకేతికతను ఎగుమతి చేసింది. ఏఐ ఫేషియల్ రికగ్నిషన్ టెక్నాలజీతో 17 కోట్లకు పైగా ఫిజికల్ కెమెరాలు ఈ వ్యవస్థలో పనిచేస్తున్నాయి.

చైనా తయారు చేసిన సీసీటీవీ కెమెరాల నెట్‌వర్క్‌ల ద్వారా పాకిస్తాన్ ఇంటెలిజెన్స్ ఏజెన్సీలు భారత వ్యూహాత్మక ప్రాంతాలు, కీలక భద్రతా మౌలిక వస్తువులను దాదాపు రియల్ టైం లో పర్యవేక్షించే ప్రమాదం ఉందని నివేదికలు చెబుతున్నాయి.

డేటాబేస్ లో చైనాలోని జాంగ్‌జియాకోవు హెబే నార్త్ యూనివర్సిటీలో చదువుతున్న విదేశీ విద్యార్థుల సమాచారం ఎక్కువగా ఉంది. వీరిలో భారత్, పాకిస్తాన్ దేశాల విద్యార్థులు అధికంగా ఉన్నారు. కెమెరాలు, ఫోన్ సిగ్నల్స్ ద్వారా వీరి కదలికలు, ప్రయాణించిన విమానాలు, రైలు సీట్ నంబర్లను ట్రాక్ చేసి చైనా పోలీస్ శాఖకు అందించారు. స్వదేశానికి తిరిగి వెళ్లిన తర్వాత కూడా ఈ నిఘా నిరంతరం కొనసాగుతోంది.

ఈ విషయంపై చైనా ఇప్పటివరకు స్పందించలేదు. అంతర్జాతీయ స్థాయిలో లీక్ పై నిరసనలు వ్యక్తమవుతున్నాయి.