పాస్టర్ చింతాడ ఆనంద్ SC సర్టిఫికెట్ రద్దు — బాపట్ల కలెక్టర్ ఉత్తర్వులు

బాపట్ల జిల్లా కలెక్టర్ వినోద్ కుమార్ పాస్టర్ చింతాడ ఆనంద్ SC సర్టిఫికెట్ రద్దు చేస్తూ ఉత్తర్వులు జారీ చేశారు. ఈ నిర్ణయంపై సోమవారం గెజిట్ నోటిఫికేషన్ విడుదల అవుతుందని అధికారులు తెలిపారు. ఆనంద్ బాపట్ల జిల్లా పిట్టలవాని పాలెంకు చెందిన వ్యక్తి.

సుప్రీం కోర్టు, హైకోర్టు తీర్పులు మరియు జిల్లా స్క్రూటినీ కమిటీ నివేదిక ఆధారంగా కలెక్టర్ ఈ నిర్ణయం తీసుకున్నారు. క్రైస్తవ మతం పాటించే వారికి SC హోదా వర్తించదని సుప్రీం కోర్టు మార్చి 24న తీర్పు ఇచ్చింది. ఆ తీర్పును అమలు చేసే క్రమంలో బాపట్ల జిల్లా యంత్రాంగం ఈ చర్య తీసుకుంది.

ఈ వ్యవహారం ఐదేళ్ల క్రితం మొదలైంది. పెట్టలవానిపాలెం మండలం కొత్తపాలెంకు చెందిన అక్కల రామిరెడ్డి మరికొందరు గ్రామస్థులపై పాస్టర్ ఆనంద్ SC/ST అట్రాసిటీ చట్టం కింద చందోలు పోలీస్ స్టేషన్లో ఫిర్యాదు చేశారు. రామిరెడ్డి హైకోర్టులో పిటిషన్ వేయగా, ఆనంద్ క్రైస్తవ మతంలోకి మారినందువల్ల ఆ కేసు చెల్లదని కోర్టు తీర్పిచ్చింది. ఆనంద్ సుప్రీం కోర్టులో పిటిషన్ వేయగా అది కూడా కొట్టివేయబడింది.

ఆ తర్వాత రామిరెడ్డి ఆనంద్ SC సర్టిఫికెట్ రద్దు కోరుతూ జిల్లా యంత్రాంగానికి ఫిర్యాదు చేశారు. కలెక్టర్ వినోద్ కుమార్ JC భావన నేతృత్వంలో జిల్లా స్థాయి విచారణ కమిటీని ఏర్పాటు చేశారు. కమిటీ మే 1న విచారణ జరిపి ఇరువురి వాదనలు విన్నది. SC సర్టిఫికెట్ రద్దు చేయాలని కమిటీ సిఫారసు చేసింది.

ఈ నెల 18వ తేదీలోగా రాతపూర్వక వివరణ ఇవ్వాలని కలెక్టర్ ఆనంద్‌కు నోటీసు జారీ చేశారు. ఆనంద్ తపాల ద్వారా వివరణ పంపి, 19న తుది విచారణకు హాజరయ్యారు. తాను పుట్టుకతో SC అని, 100 పేజీల పత్రాలు సమర్పించారు. వాటిని పరిశీలించి న్యాయ నిపుణుల సలహా తీసుకున్న తర్వాత కలెక్టర్ SC సర్టిఫికెట్ రద్దు నిర్ణయం ప్రకటించారు.

రామిరెడ్డి మాట్లాడుతూ, గత ప్రభుత్వ హయాంలో అన్యాయంగా అట్రాసిటీ కేసు పెట్టి వేధించారని ఆరోపించారు. ఈ నిర్ణయంపై తనకు సంతోషంగా ఉందని తెలిపారు. ఆనంద్ మాత్రం తన పోరాటం కొనసాగిస్తానని, సుప్రీం కోర్టులో ఇప్పటికే review petition వేశానని చెప్పారు.