CINTAA కార్యవర్గం రద్దు: 11 మంది సభ్యుల రాజీనామా; అధికార దుర్వినియోగ ఆరోపణలు

సినీ, టీవీ కళాకారుల సంఘం (CINTAA) కార్యవర్గం రద్దయింది. 11 మంది సభ్యులు ఒకేసారి రాజీనామా చేయడంతో కమిటీ స్వయంచాలకంగా రద్దయింది. మాజీ ప్రధాన కార్యదర్శి ఉపాసనా సింఘ్ ఈ మేరకు వెల్లడించారు.

ఆమె తెలిపిన వివరాల ప్రకారం హేమంత్ పాండే, ముకేశ్ ఋషి, సహిలా చద్దా, హేతల్ పర్మార్, పునీత్ ఇస్సర్, బిందు దారా సింగ్, వికాస్ వర్మ, దీపక్ పరాశర్ తదితరులు రాజీనామా చేశారు. వీరంతా కార్యనిర్వాహక సభ్యులుగా ఉన్నారు.

రాజీనామా సందర్భంగా సభ్యులు తీవ్ర ఆరోపణలు చేశారు. సంఘంలోని పద్మిని, పూనమ్లు తమ పదవిని దుర్వినియోగం చేస్తున్నారని, మెమోలు వ్యక్తిగత ఈమెయిల్ నుంచి పంపుతున్నారని, దీంతో పారదర్శకత లోపించిందని ఆరోపించారు. ఆకస్మికంగా షోకాజ్ నోటీసులు జారీ చేయడం, సభ్యుల పోస్టులు మార్చేయడం, కార్డు రద్దు వంటి చర్యలతో వేధింపులకు గురిచేస్తున్నారన్నారు.

హేమ మాలిని ఇటీవల ఒక కార్యక్రమం నుంచి ఫెడరేషన్, CINTAA లకు రూ.5 లక్షల చొప్పున ఇవ్వగా, ఫెడరేషన్‌కు పూర్తి రూ.5 లక్షలు అందాయి. కానీ CINTAA కు కేవలం రూ.4.10 లక్షలే వచ్చాయని, రూ.60 వేలు పద్మిని తన ప్రచారం కోసం ఖర్చు చేశారని సభ్యులు ఆరోపించారు. ప్రెస్‌కాన్ఫరెన్స్ సమయం కూడా తప్పుగా చెప్పి, తాము ముందుగానే మీడియాను పిలిపించుకున్నారని ఉపాసనా తెలిపారు.

CINTAA రాజ్యాంగం ప్రకారం సగానికిపైగా సభ్యులు రాజీనామా చేస్తే కమిటీ వెంటనే రద్దవుతుంది. ఈ నేపథ్యంలో త్వరలోనే తిరిగి ఎన్నికలు ప్రకటిస్తారు. సభ్యులంతా పారదర్శకమైన, స్వేచ్ఛాయుత ఎన్నికలు జరగాలని కోరుతున్నారు. ఈ విషయాన్ని లేబర్ కమిషనర్, మాతృసంస్థ అయిన ఫెడరేషన్‌కు నివేదించినట్లు ఉపాసనా సింఘ్ వెల్లడించారు.