బోయిన్‌పల్లి హోల్‌సేల్ బియ్యం దుకాణాలపై పౌర సరఫరాల శాఖ తనిఖీలు

బోయిన్‌పల్లి మార్కెట్‌లోని హోల్‌సేల్ బియ్యం దుకాణాలపై పౌర సరఫరాల శాఖ అధికారులు ఆకస్మిక తనిఖీలు నిర్వహించారు. సికింద్రాబాద్, హైదరాబాద్ పరిధిలోని ఈ మార్కెట్‌లో బియ్యం అధిక ధరలకు అమ్ముతున్నారన్న సమాచారం ఆధారంగా తనిఖీలు చేపట్టారు.

పౌర సరఫరాల విభాగాధికారి శ్రీనివాస్ మాట్లాడుతూ, అధిక ధరలకు బియ్యం విక్రయించే వారిపై కఠిన చర్యలు తీసుకుంటామని హెచ్చరించారు. ప్రభుత్వం నిర్ణయించిన ధర ప్రకారమే బియ్యం అమ్మాలని ఆయన చెప్పారు.

ప్రతి దుకాణం వద్ద ప్రభుత్వం నిర్ణయించిన ధరల పట్టికతో బ్యానర్ ఏర్పాటు చేసి అవగాహన కల్పించనున్నట్లు అధికారులు తెలిపారు. మార్కెట్‌లోని పలు దుకాణాల్లో తనిఖీలు జరిపారు.

ప్రభుత్వం నిర్దేశించిన రేట్ల కంటే ఎక్కువ వసూలు చేసినా, GST, Legal Metrology నిబంధనలు ఉల్లంఘించినా కఠిన చర్యలు తీసుకుంటామని శ్రీనివాస్ తెలిపారు. అనుమతి లేకుండా బియ్యం నిల్వ చేసిన వ్యాపారులపైనా చర్యలు ఉంటాయని ఆయన చెప్పారు.

ఇప్పటికే క్రిమినల్ కేసులు నమోదు చేస్తున్నామని, ఇకముందు కూడా కేసులు నమోదు చేస్తామని ఆయన హెచ్చరించారు.