కాశ్మీర్‌లో క్లౌడ్ బరస్ట్‌లతో వరదలు: మహిళ మృతి, 80 మంది సురక్షితంగా తరలింపు

కాశ్మీర్ లోయలో సోమవారం క్లౌడ్ బరస్ట్ కారణంగా ఆకస్మిక వరదలు సంభవించాయి. కుక్వారా జిల్లా లోలా ప్రాంతంలో నసీమా బేగం అనే మహిళ మృతి చెందింది. షోపియాన్ జిల్లాలో భారీ వర్షాలతో వరదలు ముంచెత్తాయి.

SDRF బృందాలు ఒక పాఠశాల నుంచి విద్యార్థులు, ఉపాధ్యాయులు, సిబ్బందితో సహా 80 మందిని సురక్షిత ప్రాంతాలకు తరలించాయి. అనంతనాగ్ జిల్లాలో రెండు వేర్వేరు ప్రాంతాల్లో క్లౌడ్ బరస్ట్ నమోదైంది. లిద్దర్వాగు నది ఉప్పొంగడంతో అనంతనాగ్-పహల్గాం జాతీయ రహదారిపై లాంగ్నాయి వంతన వద్ద రోడ్డు కొంత భాగం కొట్టుకుపోయింది.

పహల్గాంలోని నానూన్ బేస్ క్యాంపులో ఒక కాంక్రీట్ గోడ కూలిపోవడంతో నీరు టెంట్లలోకి చేరి పలు రెసిడెన్షియల్ టెంట్లు దెబ్బతిన్నాయి. గంధర్బల్ జిల్లా బాకురా ప్రాంతంలో ఈదురుగాలులకు ఇంటి పైకప్పు ఎగిరిపోగా, విద్యుత్ స్తంభం నేలకొరిగింది.

ప్రభుత్వం సహాయక చర్యలు ముమ్మరం చేసింది. అన్ని జిల్లాల యంత్రాంగం, పోలీసులు అప్రమత్తంగా ఉన్నారు. వరద పరిస్థితుల నేపథ్యంలో ప్రజలు అనవసర ప్రయాణాలు మానుకోవాలని అధికారులు విజ్ఞప్తి చేశారు.