మహిళలు, చిన్నారుల రక్షణపై సీఎం చంద్రబాబు ఉన్నతస్థాయి సమీక్ష

ఆంధ్రప్రదేశ్ ముఖ్యమంత్రి చంద్రబాబు నాయుడు ఇవాళ మధ్యాహ్నం 3:30 గంటలకు రాష్ట్ర శాంతిభద్రతలు, నేర నియంత్రణపై ఉన్నతస్థాయి సమీక్ష నిర్వహించనున్నారు. సచివాలయంలో జరిగే ఈ సమావేశంలో డీజీపీ స్థాయి నుంచి స్థానిక పోలీస్ స్టేషన్ల ఎస్హెచ్ఓల వరకు దాదాపు 1,300 మంది అధికారులు పాల్గొంటారు. ఉన్నతాధికారులు ప్రత్యక్షంగా హాజరవుతుండగా, జిల్లా స్థాయి అధికారులు, ఎస్హెచ్ఓలు వీడియో కాన్ఫరెన్స్ ద్వారా పాల్గొంటారు.

మహిళలు, చిన్నారులపై జరుగుతున్న నేరాలు, సైబర్ నేరాలు, సోషల్ మీడియాలో దుష్ప్రచారాలు, గంజాయి నిర్మూలన, బ్లేడ్ బ్యాచ్ల అరాచకాలు వంటి అంశాలపై ఈ సమావేశంలో చర్చించనున్నారు. రాష్ట్రంలోని వివిధ పోలీస్ స్టేషన్ల పనితీరు, నమోదవుతున్న కేసులు, శాంతిభద్రతల పర్యవేక్షణ తీరుపై సీఎం వద్ద ఉన్న క్షేత్రస్థాయి నివేదికలను అధికారుల ముందు ఉంచి సమగ్రంగా విశ్లేషిస్తారు.

రాష్ట్రంలో శాంతిభద్రతలకు విఘాతం కలిగించే వారిపై, చట్టాల్ని అతిక్రమించే వారిపై కఠిన చర్యలు తీసుకోవాలని, మహిళలు, బలహీన వర్గాల రక్షణకు అత్యధిక ప్రాధాన్యత ఇవ్వాలని సీఎం పోలీసులకు స్పష్టమైన దిశానిర్దేశం చేయనున్నారు. ఇటీవల శ్రీకాకుళంలో మహిళా ఎస్ఐపై దాడి, చిత్తూరు జిల్లాలో మహిళా ఏఎస్ఐపై దాడి, విజయవాడ సాయి కృష్ణ లాకప్ డెత్ వంటి సంఘటనల నేపథ్యంలో పోలీస్ వ్యవస్థకు దిశానిర్దేశం అవసరమని సీఎం భావిస్తున్నారు.

నిరసన నిర్వహణపై ప్రజాస్వామ్యబద్ధంగా, ప్రజలకు ఇబ్బంది లేని విధంగా నిరసనలు చేసుకోవచ్చని సీఎం ఇప్పటికే స్పష్టం చేశారు. రోడ్లపై నిరసనలు, గంజాయి బ్యాచ్, బ్లేడ్ బ్యాచ్ పాల్గొనే కార్యక్రమాలను ఉపేక్షించబోమని చెప్పారు. ప్రభుత్వ వర్గాల సమాచారం ప్రకారం, రాష్ట్రంలో శాంతిభద్రతలు మెరుగ్గా ఉండడంతో దేశంలో వచ్చే పెట్టుబడుల్లో 25 శాతం ఆంధ్రప్రదేశ్‌కు వస్తున్నాయి. ఈ ధోరణి కొనసాగేలా పోలీసులు జాగ్రత్తలు తీసుకోవాలని సీఎం సూచించనున్నారు.

ఈ సమావేశం మధ్యాహ్నం 3:30 నుంచి సాయంత్రం 6 గంటల వరకు కొనసాగుతుంది.