రెబెల్ అభ్యర్థులు పోటీలో ఉంటే సస్పెండ్ అయినట్లే: CM చంద్రబాబు హెచ్చరిక

ఆంధ్రప్రదేశ్ క్యాబినెట్ సమావేశంలో ముఖ్యమంత్రి చంద్రబాబు నాయుడు స్థానిక సంస్థల ఎన్నికలకు సంబంధించి కీలక వ్యాఖ్యలు చేశారు. కూటమి పార్టీల రెబెల్ అభ్యర్థులు పోటీలో ఉంటే వారు సస్పెండ్ అయినట్లేనని స్పష్టంగా తేల్చి చెప్పారు.

క్యాబినెట్ ఎజెండా అంశాల చర్చ ముగిసిన తర్వాత ఎన్నికల పొత్తులు మరియు రెబెల్ అభ్యర్థుల అంశంపై విస్తృత చర్చ జరిగింది. TDP, జనసేన, BJP మూడు పార్టీలు సమన్వయంతో సీట్ల సర్దుబాటు చేసుకున్నాయని, అయినప్పటికీ కొన్ని చోట్ల రెబెల్ అభ్యర్థులు పోటీలో నిలుస్తున్నారని ముఖ్యమంత్రి ఆందోళన వ్యక్తం చేశారు.

B ఫామ్ పొందిన అభ్యర్థులు మాత్రమే పోటీలో ఉండాలని, లేకుంటే ఫలితాలు తారుమారై తప్పుడు సంకేతాలు వచ్చే అవకాశం ఉందని హెచ్చరించారు. అభ్యర్థుల గెలుపు బాధ్యత మంత్రులదేనని, ఎన్నికల్లో వివాదాలు ఉంటే వెంటనే పరిష్కరించాలని మంత్రులను ఆదేశించారు చంద్రబాబు.

కూటమి పార్టీలు పొత్తు ధర్మాన్ని పాటించాల్సిందేనని, ఇందులో రెండో ఆలోచనకు ఆస్కారం లేదని ముఖ్యమంత్రి స్పష్టం చేశారు. అభ్యర్థిని కాదు, NDA ను చూసి ఓటు వేయాలని పిలుపునిచ్చారు.

డిప్యూటీ CM పవన్ కళ్యాణ్ మాట్లాడుతూ తాను, చంద్రబాబు, మాధవ్ కలిసి కూర్చొని సీట్ల సర్దుబాటు చేసామని, ప్రజల నుంచి మరియు పార్టీ క్యాడర్ నుంచి మంచి స్పందన వస్తుందని తెలిపారు. జనసేన మరియు BJP నుంచి వచ్చే చిన్న చిన్న సమస్యలను కూడా పరిష్కరిస్తున్నామని చెప్పారు.

మున్సిపల్ ఎన్నికలు నవంబర్ 1వ తారీకు, పరిషత్ ఎన్నికలు 5వ తారీకు జరుగుతాయని తెలిపారు. ఆ తర్వాత MPTC, ZPTC, పంచాయతీ, సొసైటీ ఎన్నికలు నిర్వహించి పాలనపై పూర్తి స్థాయిలో దృష్టి పెడతామని ముఖ్యమంత్రి వెల్లడించారు.

క్యాబినెట్ సమావేశంలో 40కి పైగా ఎజెండా అంశాలు చర్చించారు. State Investment Promotion Board ఏర్పాటు, ఉద్యోగ ఉపాధి అవకాశాలు, రాష్ట్రంలో పెట్టుబడులకు సంబంధించిన నిర్ణయాలు ప్రధానంగా తీసుకున్నారు.

తుఫాన్ కారణంగా రాష్ట్రంలో 4000 కోట్లకు పైగా నష్టం జరిగిందని, రేపు కేంద్ర బృందం ఏపీకి వచ్చి అధికారులతో కలిసి నష్టం అంచనాలు వేస్తారని చంద్రబాబు తెలిపారు. రైతులకు జరిగిన నష్టాన్ని నిర్ధారించడానికి ఉద్యానవన, వరి పంటలకు సంబంధించి అంచనాలు తయారు చేయాలని అధికారులను ఆదేశించారు. డిప్యూటీ CM పవన్ కళ్యాణ్ రేపు కాకినాడలో తుఫాన్ బాధిత ప్రాంతాల సమీక్ష నిర్వహిస్తారని ప్రకటించారు.