హైదరాబాద్ మెట్రో, రైల్వే ప్రాజెక్టులపై కేంద్ర మంత్రులతో సీఎం రేవంత్ రెడ్డి భేటీ

తెలంగాణ ముఖ్యమంత్రి రేవంత్ రెడ్డి రెండు రోజుల ఢిల్లీ పర్యటన ప్రారంభించారు. ఈ పర్యటనలో కేంద్ర మంత్రులతో రాష్ట్ర అభివృద్ధి ప్రాజెక్టులపై ఆయన చర్చించనున్నారు.

సీఎం రేవంత్ రెడ్డి ఈ రోజు మధ్యాహ్నం 12 గంటలకు కేంద్ర రక్షణ మంత్రి రాజ్‌నాథ్ సింగ్‌తో భేటీ కానున్నారు. గాంధీ ప్రాజెక్టుకు డిఫెన్స్ క్లియరెన్స్ ఇచ్చినందుకు ఆయనకు కృతజ్ఞతలు తెలుపనున్నారు. అదే విధంగా కేంద్ర రైల్వే మంత్రి అశ్విని వైష్ణవ్, ఆర్థిక మంత్రి నిర్మల సీతారామన్, పట్టణాభివృద్ధి మంత్రి మనోహర్ లాల్ ఖట్టర్‌లతో అపాయింట్‌మెంట్లు కోరారు.

హైదరాబాద్ మెట్రో రైల్ ప్రాజెక్ట్ రెండో దశ విస్తరణ కోసం నిధులు పెండింగ్‌లో ఉన్నాయి. ఇప్పటికే రాష్ట్ర ప్రభుత్వం కేంద్రం విధించిన షరతులన్నింటినీ నెరవేర్చింది. అయినా రూ. 1,400 కోట్ల నిధులు ఇంకా విడుదల కాలేదు. ఈ నెల 15వ తేదీకి ఆ నిధులు మంజూరు కావాల్సి ఉన్నా ఇప్పటివరకు జరగలేదు. ఇటీవల నీతి ఆయోగ్ సమావేశంలోనూ సీఎం ఈ విషయాన్ని కేంద్ర మంత్రి దృష్టికి తీసుకెళ్లారు.

రాష్ట్రంలో ఏళ్ల తరబడి పెండింగ్‌లో ఉన్న వివిధ రైల్వే లైన్ల విస్తరణ, కొత్త ప్రాజెక్టులపై పూర్తి నివేదికను సీఎం కేంద్ర మంత్రులకు అందించనున్నారు. ఢిల్లీ వెళ్లే ముందు కేంద్ర మంత్రి కిషన్ రెడ్డికి లేఖ రాసిన సీఎం, ఈ నెల 22, 23 తేదీల్లో తాను ఢిల్లీలో అందుబాటులో ఉంటానని, రైల్వే మంత్రితో సమావేశం ఏర్పాటు చేయాలని కోరారు.