సూర్యాపేటలో కాంగ్రెస్ పార్టీ రెండు వర్గాల మధ్య ఘర్షణ; మండల అధ్యక్ష నియామకాలపై వివాదం

సూర్యాపేట జిల్లా జాజిరెడ్డిగూడంలో కాంగ్రెస్ పార్టీలో మండల అధ్యక్ష నియామకాలపై వర్గపోరు తీవ్రమైంది. అర్వపల్లి చౌరస్థాలో రెండు వర్గాల మధ్య ఘర్షణ చోటు చేసుకుంది.

ఇటీవల చేపట్టిన మండల పార్టీ అధ్యక్షుల నియామకాల్లో తమకు ప్రాధాన్యం లభించలేదని అసమ్మతి వర్గం గాంధీ భవన్కు వెళ్లేందుకు సిద్ధమైంది. అయితే ఎమ్మెల్యే వర్గం వారిని అడ్డుకోవడంతో రెండు వర్గాల మధ్య వాగ్వాదం చోటు చేసుకుని, రాళ్లు, కర్రలతో దాడి జరిగింది. ఈ ఘర్షణలో కొన్ని కార్ల అద్దాలు ధ్వంసమయ్యాయి, కొంతమంది కాంగ్రెస్ కార్యకర్తలు గాయపడ్డారు. పోలీసులు ఘటనా స్థలానికి చేరుకుని, ఇరు వర్గాలను చెదరగొట్టేందుకు లాటీ ఛార్జ్ చేశారు. పలువురిని పోలీస్ స్టేషన్కు తరలించారు.

కాంగ్రెస్ ఎమ్మెల్యే ఈ నియామకాలను తనకు విధేయులుగా ఉన్నవారికే కేటాయించారని, బీఆర్ఎస్ పార్టీ నుంచి వచ్చిన నేతలకు అవకాశం ఇవ్వలేదని అసమ్మతి వర్గం ఆరోపించింది. ఈ నియామకాలపై ఎంపీ కూడా అసంతృప్తి వ్యక్తం చేస్తూ పీసీసీ అధ్యక్షుడికి లేఖ రాశారు. అయితే ఎమ్మెల్యే తన నిర్ణయమే ఫైనల్ అని, మార్పు లేదని ప్రకటించడంతో వివాదం మరింత ముదిరింది. దీంతో పార్టీలో రెండు వర్గాలు ఏర్పడి ఈ ఘర్షణకు దారితీసాయి.

ప్రస్తుతం పోలీసులు పరిస్థితిని అదుపులోకి తీసుకున్నారు. ఘటనపై కేసు నమోదు చేసి దర్యాప్తు చేస్తున్నారు. ఈ ఘర్షణపై ఎమ్మెల్యే స్పందన తెలియాల్సి ఉంది.