హైదరాబాద్‌లో CREDAI ప్రాపర్టీ షో 2026: ఆగస్ట్ 28-30 తేదీల్లో హైటెక్స్‌లో

హైదరాబాద్ రియల్ ఎస్టేట్ రంగంలో ప్రముఖ ప్రాపర్టీ షో అయిన CREDAI హైదరాబాద్ ప్రాపర్టీ షో 2026 ను హైటెక్స్ వేదికగా నిర్వహిస్తున్నారు. ఈ ఈవెంట్ ఆగస్టు 28 నుంచి 30 వరకు జరగనుంది. CREDAI హైదరాబాద్ ప్రెసిడెంట్-ఎలక్ట్ జగన్నాథ్ ఈ వివరాలు తెలిపారు.

ఈ ప్రాపర్టీ షో లో 50 లక్షల విలువ చేసే అపార్ట్‌మెంట్ల నుంచి అత్యంత విలాసవంతమైన విల్లాల వరకు వివిధ బడ్జెట్లకు తగిన ప్రాపర్టీలు అందుబాటులో ఉంటాయని జగన్నాథ్ చెప్పారు. ఒకే వేదికపై అన్ని ప్రాజెక్టుల బ్రోచర్లు సేకరించుకోవడం, డెవలపర్లతో నేరుగా మాట్లాడటం వల్ల కొనుగోలుదారులకు నిర్ణయం తీసుకోవడం సులువు అవుతుందని ఆయన వివరించారు.

ఈ సందర్భంగా హైదరాబాద్ మార్కెట్ లో అందుబాటులో ఉన్న స్టాక్ పై జగన్నాథ్ స్పందించారు. సోషల్ మీడియాలో ప్రచారమవుతున్న భారీ స్టాక్ గణాంకాలు వాస్తవం కాదని, కేవలం అనుమతుల దశలో ఉన్న ప్రాజెక్టులను కూడా కలిపి లెక్క చెబుతున్నారని ఆయన పేర్కొన్నారు. ఇప్పటికే అనుమతులు వచ్చిన ప్రాజెక్టులను మాత్రమే స్టాక్‌గా పరిగణించాలని, నెలవారీ, ఏడాది వారీ కొత్తగా మార్కెట్ లోకి వస్తున్న యూనిట్ల ఆధారంగానే లెక్కలు ఉండాలని వివరించారు.

ఒకేసారి పూర్తి చెల్లింపు (వన్ టైం పేమెంట్) పథకాల పట్ల జాగ్రత్తగా ఉండాలని జగన్నాథ్ సూచించారు. నిర్మాణ ఖర్చులు పెరుగుతున్న నేపథ్యంలో ఇలాంటి ఆఫర్లు ఇచ్చేవి నాణ్యత పరంగా రాజీ పడే అవకాశం ఉందని, అందువల్ల వాటికి దూరంగా ఉండాలని ఆయన చెప్పారు.