అర్నాబ్ తుఫాను: కాకినాడ ఉప్పాడ తీరంలో భారీ అలలు, 50 వేల మంది పునరావాసం

కాకినాడ జిల్లా ఉప్పాడ తీర ప్రాంతంలో అర్నాబ్ తుఫాను ప్రభావం కనిపిస్తోంది. సముద్రం అల్లకల్లోలంగా మారింది. భారీ ఈదురుగాలులతో పాటు వర్షం కురుస్తోంది.

తీరం వెంబడి ఉవ్వెత్తున అలలు ఎగురుతున్నాయి. తీర రక్షణ కోసం ఏర్పాటు చేసిన బండరాళ్లు కూడా గాలికి ఎగిరి రోడ్డుపై పడుతున్నాయి. దీంతో ఉప్పాడ–కాకినాడ బీచ్ రోడ్డుపై రాకపోకలను నిలిపివేశారు. పోలీసులు బారికేడ్లు ఏర్పాటు చేశారు.

తీర ప్రాంతంలోని మత్స్యకారులను పునరావాస కేంద్రాలకు తరలిస్తున్నారు. ఇప్పటికే దాదాపు 50 వేల మందిని పునరావాస కేంద్రాలకు తరలించినట్లు అధికారులు తెలిపారు. మొత్తం 80 వేల మందిని తరలించేలా ఏర్పాట్లు చేస్తున్నారు. బోట్లన్నీ ఒడ్డుకు చేరాయి.

తుఫాను కాకినాడ, కోనసీమ మధ్య యానాం ప్రాంతంలో తీరం దాటే అవకాశం ఉందని అధికారులు అంచనా వేస్తున్నారు. కాకినాడ జిల్లాలో తాళ్లరేవు నుంచి తొండంగి వరకు ఆరు మండలాలపై పూర్తి స్థాయిలో ప్రభావం ఉంటుంది. మరో ఐదు మండలాలపై పాక్షిక ప్రభావం ఉంటుంది.

రెండు రోజుల పాటు భారీ వర్షాలు, ఈదురుగాలులు కొనసాగుతాయని IMD హెచ్చరికలు జారీ చేసింది. విద్యుత్ స్తంభాలు, చెట్లు పడిపోయే ప్రమాదం ఉందని అధికారులు చెప్తున్నారు. విద్యుత్ సరఫరాలో అంతరాయం ఏర్పడే అవకాశం ఉంది. విద్యుత్ శాఖ అధికారులు అప్రమత్తంగా ఉన్నారు.