ప్రభాస్ 'ఫౌజీ' టీజర్‌పై విమర్శలు: నేతాజీ పాత్ర ప్రదర్శనపై అభ్యంతరం

ప్రభాస్ నటిస్తున్న 'ఫౌజీ' సినిమా టీజర్‌పై విమర్శలు వ్యక్తమవుతున్నాయి. అక్టోబర్ 23న ప్రభాస్ పుట్టినరోజు సందర్భంగా చిత్రబృందం ఈ టీజర్‌ను విడుదల చేసింది. టీజర్ విడుదలైన వెంటనే దానిపై అభ్యంతరాలు వెల్లువెత్తాయి.

టీజర్ రెండో ప్రపంచ యుద్ధం కాలంలో బెర్లిన్‌లో నేతాజీ సుభాష్ చంద్రబోస్, జర్మనీ నియంత అడాల్ఫ్ హిట్లర్ భేటీ చారిత్రక ఘటనతో మొదలవుతుంది. ఆ సన్నివేశంలో నేతాజీ పాత్ర ప్రభాస్ పోషించిన కల్పిత గూడాచారి గురించి ప్రస్తావిస్తుంది. బ్రిటిష్ పాలకులకు ఆ గూడాచారి ఎలా ఇబ్బందులు కలిగించాడో వివరిస్తుంది.

ఈ సన్నివేశంపై నేతాజీ మనవడు చంద్రకుమార్ బోస్ అభ్యంతరం వ్యక్తం చేశారు. స్వాతంత్ర సమర యోధులకు సంబంధించిన చారిత్రక విషయాలను వక్రీకరించడం సరికాదని ఆయన అన్నారు. సృజనాత్మక స్వేచ్ఛ పేరుతో చరిత్రను మార్చి చూపించకూడదని స్పష్టం చేశారు. కల్పిత పాత్రను గొప్పగా చూపించేందుకు నేతాజీ స్థాయిని తగ్గించినట్లు ఉండకూడదని ఆయన అన్నారు.

నేతాజీ, హిట్లర్ భేటీని సినిమాలో తప్పుగా చూపించారని బోస్ ఆరోపించారు. హిట్లర్‌తో నేతాజీ సమాన స్థాయిలో మాట్లాడారని, భారత స్వాతంత్ర పోరాటానికి మద్దతు పొందడమే ఆయన లక్ష్యమని ఆయన వివరించారు. దర్శకుడు హను రాఘవపూడి దేశ ప్రజలందరికీ క్షమాపణ చెప్పాలని డిమాండ్ చేశారు.

సమాజ్‌వాదీ పార్టీ ఎంపీ అవధేష్ ప్రసాద్ కూడా ఈ వివాదంపై స్పందించారు. నేతాజీని హిట్లర్‌తో పోల్చడం సరికాదని ఆయన అభ్యంతరం వ్యక్తం చేశారు. చరిత్రలో కీలక పాత్ర పోషించిన జాతీయ నాయకుల విషయంలో జాగ్రత్తగా వ్యవహరించాలని అభిప్రాయపడ్డారు.

మరోవైపు కొందరు చిత్రబృందానికి మద్దతు తెలుపుతున్నారు. కథ కల్పిత అంశాలతో కూడుకున్నదని, దానిలో లాజిక్ వెతకకూడదని వారి వాదన. హను రాఘవపూడి దర్శకత్వం వహిస్తున్న ఈ చిత్రం 2027 మార్చి 19న విడుదల కానుంది.