కోనసీమలో అర్నాబ్ తుఫాన్ ప్రభావం: 2 రోజులు పాఠశాలలకు సెలవులు

అర్నాబ్ తుఫాన్ ప్రభావంతో అంబేద్కర్ కోనసీమ జిల్లాలో వాతావరణం మారిపోయింది. తీర ప్రాంతాల్లో సముద్రం ఉద్రిక్తంగా ఉంది. జిల్లాలో రెండు రోజుల పాటు పాఠశాలలకు సెలవులు ప్రకటించారు.

జిల్లా కలెక్టర్ మహేష్ కుమార్ ఈ సెలవులను ప్రకటించారు. అత్యవసర సహాయం కోసం కంట్రోల్ రూమ్‌లను ఏర్పాటు చేశారు.

ఉప్పలగుప్తం మండలం వాసాల తిప్పలో వేటకు వచ్చి చిక్కుకున్న నక్కపల్లికి చెందిన 400 మంది మత్స్యకారులను తుఫాన్ షెల్టర్లకు తరలించారు. అక్కడి మత్స్యకార కుటుంబాలను కూడా షెల్టర్లకు తరలించారు. అమలాపురం డివిజన్ పరిధిలో మరో 1,000 నుంచి 1,500 మందిని సురక్షిత ప్రాంతాలకు తరలించే చర్యలు చేపట్టారు.

అమలాపురం RDO సరళాదేవి తీర ప్రాంతాల్లో పర్యటించి సహాయక చర్యలను పర్యవేక్షించారు. SP రాహుల్ మీనా ఆదేశాల మేరకు అధికారులు కాట్రేనికోణ మండలం గచ్చికాయలపర గ్రామంలోని సముద్ర తీర ప్రాంతాన్ని సందర్శించారు.

ఆ గ్రామంలో సుమారు 300 నుంచి 400 కుటుంబాలు నివసిస్తున్నాయి. ఇక్కడ 25 బోట్లు ఉన్నాయి. తుఫాన్ పరిస్థితులను వివరించి, వారిని తుఫాన్ షెల్టర్‌కు తరలించేందుకు అధికారులు ఒప్పించారు. గ్రామస్తులు అంగీకారం తెలిపారు.

షెల్టర్‌లో అవసరమైన సౌకర్యాలు, నిత్యవసర వస్తువులు ప్రభుత్వం ద్వారా అందిస్తామని అధికారులు తెలిపారు. తుఫాన్ సమయంలో బోట్లను సముద్రంలోకి వెళ్లనివ్వరాదని మత్స్యకారులకు సూచించారు. వారు ఈ సూచనలకు అంగీకారం తెలిపారు.