స్థానిక సంస్థల ఎన్నికల ప్రచారం జోరు: హోమ్ మంత్రి అనిత B-forms అందజేత

ఆంధ్రప్రదేశ్‌లో స్థానిక సంస్థల ఎన్నికల ప్రచారం జోరుగా సాగుతోంది. పోటీలో ఉన్న అభ్యర్థులు ఇంటింటికి తిరిగి ఓటర్లను ఓటు అడుగుతున్నారు.

అనకాపల్లి జిల్లా పాయకరావుపేట నియోజకవర్గంలో TDP ఎంపీటీసీ స్థానాల్లో పోటీ చేస్తున్న అభ్యర్థులకు హోమ్ మంత్రి వంగలపూడి అనిత B-forms అందజేశారు. కూటమి అభ్యర్థుల గెలుపు కోసం నాయకులు కృషి చేయాలని ఆమె సూచించారు. పాయకరావుపేటలో కూటమి అభ్యర్థులు ప్రచారాన్ని ముమ్మరం చేశారు. ఇళ్లకు వెళ్లి ఓట్లు అడుగుతున్నారు.

ఎన్టీఆర్ జిల్లా తిరువూరులో అభ్యర్థుల ప్రచార కార్యక్రమంలో ఎంపీ కేశినేని శివనాథ్ పాల్గొన్నారు. స్థానిక వినాయక ఆలయంలో ఆయన ప్రత్యేక పూజలు నిర్వహించారు. అనంతరం ప్రచార రథం నుంచి కూటమి అభ్యర్థులను గెలిపించాలని ప్రజలకు విజ్ఞప్తి చేశారు. దీంతో తిరువూరులో ఎన్నికల సందడి నెలకొంది.

కర్నూలు నగరంలోనూ ప్రచారం పోటాపోటీగా సాగుతోంది. 44వ వార్డులో BJP కార్పొరేటర్ అభ్యర్థి మీసాల రమాదేవి తరఫున పాన్యం ఎమ్మెల్యే గౌరు చరితా రెడ్డి ఇంటింటికి తిరిగి ఓట్లు అడిగారు. కూటమి ప్రభుత్వం అమలు చేస్తున్న సంక్షేమ, అభివృద్ధి కార్యక్రమాలను పరిగణనలోకి తీసుకుని ఓటు వేయాలని ఆమె ప్రజలను కోరారు.

అదే నగరంలో 43వ వార్డు YSRCP అభ్యర్థి సానా అనసూయ ఇంటింటికి ప్రచారం చేశారు. 44వ వార్డులో స్వతంత్ర అభ్యర్థిగా పోటీ చేస్తున్న దేవకుమారికి వామపక్ష పార్టీలు మద్దతు తెలిపి ప్రచారం చేశాయి.