విజయనగరంలో పైడితల్లి అమ్మవారి సిరిమానోత్సవం.. మూడు గంటలకు ఊరేగింపు

విజయనగరంలో పైడితల్లి అమ్మవారి సిరిమానోత్సవం ఈరోజు జరుగుతోంది. మధ్యాహ్నం మూడు గంటలకు అమ్మవారి సిరిమాను ఊరేగింపు ప్రారంభం కానుంది.

ఉత్తరాంధ్రతో పాటు పొరుగు రాష్ట్రాల నుంచి భారీ సంఖ్యలో భక్తులు తరలివస్తున్నారు. ఈ ఉత్సవానికి సుమారు మూడు లక్షల మంది భక్తులు వస్తారని అధికారులు అంచనా వేస్తున్నారు.

భక్తులకు ఎలాంటి అసౌకర్యం కలగకుండా యంత్రాంగం ఏర్పాట్లు చేసింది. సోమవారం 3,500 మంది పోలీసులతో బందోబస్తు ఏర్పాటు చేశారు. తాగునీరు, మజ్జిగ, పానకం వంటి సౌకర్యాలు కల్పిస్తున్నారు.

భక్తులు అమ్మవారికి ఘటాలు సమర్పిస్తున్నారు. విశాఖపట్నం నుంచి వచ్చిన భక్తులు తాము చిన్నప్పటి నుంచి ఇక్కడికి వస్తున్నామని చెప్పారు. వర్షం పడినా ఘటాల సమర్పణ ఆగలేదని, ఏర్పాట్లు బాగున్నాయని వారు తెలిపారు. అమ్మవారి దర్శనం కూడా సక్రమంగా జరిగిందని భక్తులు చెబుతున్నారు.