మురసు తుఫాను: ప్రకాశం జిల్లాలో వందల విద్యుత్ స్తంభాలు కుప్పకూలి 48 గంటలుగా కరెంటు లేదు

మురసు తుఫాను ప్రభావంతో ప్రకాశం జిల్లాలో భారీగా చెట్లు, విద్యుత్ స్తంభాలు నేలకొరిగాయి. దీంతో జిల్లాలోని పట్టణాలు, పల్లెల్లో దాదాపు 48 గంటలుగా విద్యుత్ సరఫరా నిలిచిపోయింది.

గంటకు 100 నుంచి 120 కిలోమీటర్ల వేగంతో ఈదురుగాలులు వీచాయి. వందల సంఖ్యలో విద్యుత్ స్తంభాలు కుప్పకూలాయి. రహదారుల పక్కన ఏళ్ల తరబడి నిలిచిన వేప, చింత చెట్లు కూడా నేలకొరిగాయి.

వేల ఎకరాల్లో వరి, పత్తి, మిరప, పొగాకు పంటలు నీట మునిగాయని రైతులు చెప్తున్నారు. మేదరమెట్ల, నాగులుప్పలపాడు తదితర గ్రామాల రైతులు పంట నష్టంపై ఆందోళన వ్యక్తం చేస్తున్నారు. పెట్టుబడి పెట్టి సాగు చేసిన పంట చేతికి రావడం లేదని వారు చెప్తున్నారు.

బస్ స్టాండ్ ప్రాంతంలో టీ కొట్టు, బజ్జీ షాప్లతో సహా 10కి పైగా చిన్న దుకాణాలు పూర్తిగా దెబ్బతిన్నాయి. ఒక పెద్ద చెట్టు హోటల్‌పై పడి భవనం దెబ్బతింది. చెన్నై-కోల్‌కతా ప్రధాన రహదారిపై కొన్ని లారీలు గాలులకు బోల్తా పడ్డాయి.

విద్యుత్ సిబ్బంది, స్థానిక అధికారులు అప్రమత్తమై సహాయ చర్యలు చేపట్టారు. ఆస్తి నష్టం పెద్ద స్థాయిలో ఉంటుందని అధికారులు అంచనా వేస్తున్నారు. ఇప్పటివరకు ప్రాణనష్టం జరిగినట్టు సమాచారం లేదు. పల్నాడు జిల్లాపై కూడా ఈ తుఫాను ప్రభావం పడింది. పంట, ఆస్తి నష్టానికి ప్రభుత్వం ఆదుకోవాలని రైతులు విజ్ఞప్తి చేస్తున్నారు. విద్యుత్ సరఫరాను పునరుద్ధరించే పనులు కొనసాగుతున్నాయి.