కాకినాడలో భారీ వర్షం.. నగరం జలమయం, పాఠశాలలకు సెలవు

కాకినాడ నగరంలో రాత్రి నుంచి ఎడతెరిపి లేకుండా కురుస్తున్న భారీ వర్షాలతో పలు ప్రాంతాలు జలమయమయ్యాయి. మురసు తుఫాను ప్రభావంతో కురిసిన వర్షాలకు ప్రధాన రోడ్లపై మోకాలి నుంచి నడుము లోతు వరకు నీరు నిలిచింది. దీంతో జిల్లా కలెక్టర్ హరీంద్ర ప్రసాద్ ఉదయం నుంచి పాఠశాలలు, కళాశాలలకు సెలవులు ప్రకటించారు.

కాకినాడ నగరంలో 12 సెంటీమీటర్ల వర్షపాతం నమోదైందని అధికారులు తెలిపారు. ప్రత్తిపాడు, తుని, సామర్లకోట, కత్తిపూడి ప్రాంతాల్లో 10 సెంటీమీటర్ల వర్షపాతం నమోదైంది. జిల్లా వ్యాప్తంగా కూడా సుమారు 12 సెంటీమీటర్ల వర్షం కురిసినట్లు అధికారులు చెప్పారు. నగరంలోని సినిమా హాల్ రోడ్‌లో దాదాపు నాలుగు కిలోమీటర్ల మేర రోడ్డు నీట మునిగింది. రోడ్లపై బైకులు, స్కూటీలు నీటిలో నిలిచిపోయాయి. సైలెన్సర్‌లోకి నీరు చేరడంతో వాహనాలను నెట్టుకుంటూ తీసుకెళ్లాల్సిన పరిస్థితి ఏర్పడింది. దుకాణాల సెల్లార్లు, ఎలక్ట్రికల్ ప్యానెల్‌లు నీటిలో మునిగాయి. ఆర్టీసీ కాంప్లెక్స్, బస్ స్టేషన్, రైతు బజార్, గుడారిగుంట, సామూర్తి నగర్, ఇందిరా నగర్, శశికాంత్ నగర్, పల్లవరాజుపేట ప్రాంతాల్లోనూ నీరు చేరింది.

కాకినాడ నగరంలో 50 డివిజన్లు ఉన్నాయి. వీటిలో 25 లోతట్టు ప్రాంతాలు. సాధారణ వర్షాలతో ఇక్కడ నీరు మూడు గంటల్లో తగ్గిపోతుంది. కానీ వరుస తుఫాన్ల కారణంగా నగరం అతలాకుతలమైంది. ఇటీవల వచ్చిన తుఫానుతో ఐదు రోజుల పాటు నగరవాసులు ఇబ్బందులు పడ్డారు. ఆ తర్వాత ఒక రోజు గ్యాప్ ఇచ్చి మళ్లీ ఈ తుఫాను ప్రభావం మొదలైంది.

కలెక్టరేట్, జిల్లా పరిషత్ కార్యాలయం, పిఠాపురం రాజా సర్కిల్ ప్రాంతాల్లో కూడా నీరు చేరింది. కొన్ని చోట్ల భారీ చెట్లు నేలకొరిగాయి. వాటిని తొలగించే పనిలో అధికారులు నిమగ్నమయ్యారు. విద్యుత్ సరఫరాకు అంతరాయం కలగకుండా చర్యలు తీసుకున్నట్లు అధికారులు తెలిపారు. మురుగునీరు సాఫీగా వెళ్లేలా మున్సిపల్ సిబ్బంది ప్రధాన డ్రెయిన్లను శుభ్రం చేస్తున్నారు. ఈ మేరకు కలెక్టర్ అధికారులకు సూచనలు చేశారు.

సాయంత్రం వరకు ఇదే పరిస్థితి కొనసాగే అవకాశం ఉందని స్థానికులు చెబుతున్నారు. తుఫాను ప్రభావం రేపు కూడా ఉంటే పాఠశాలలు, కళాశాలలకు సెలవులు ప్రకటిస్తామని జిల్లా కలెక్టర్ హరీంద్ర ప్రసాద్ తెలిపారు.