తుఫాన్ సహాయంపై మూడు రాష్ట్రాలతో సమన్వయం చేశాం: CM చంద్రబాబు

తుఫాన్ సహాయ చర్యలపై పొరుగు రాష్ట్రాలతో సమన్వయం చేసుకున్నామని ముఖ్యమంత్రి చంద్రబాబు నాయుడు తెలిపారు. తెలంగాణ, తమిళనాడు, కర్ణాటక ప్రభుత్వాలతో మాట్లాడి అవసరమైన సహాయం తీసుకున్నట్టు ఆయన చెప్పారు.

తెలంగాణ డిప్యూటీ సీఎం భట్టి విక్రమార్కకు తాను ఫోన్ చేసి, వెంటనే సిబ్బందిని పంపాలని కోరినట్టు చంద్రబాబు వివరించారు. అంతకుముందే తమ మంత్రి ఒకరు కూడా ఫోన్ చేసి మాట్లాడారని ఆయన తెలిపారు. వారు వెంటనే సిబ్బందిని పంపి సహకరించారని చెప్పారు.

రెండోసారి తుఫాన్ సమయంలో తమిళనాడు ముఖ్యమంత్రితో, కర్ణాటకకు చెందిన శివకుమార్‌తో మాట్లాడినట్టు ఆయన తెలిపారు. కష్ట సమయంలో రాష్ట్రాల మధ్య భేదాలు చూడకుండా సహాయం తీసుకున్నామని ఆయన అన్నారు. మూడు రాష్ట్రాలూ సానుకూలంగా స్పందించి సహాయం చేశాయని చెప్పారు. గతంలో ఒడిశాలో భారీ తుఫాను సమయంలో అడగకపోయినా తాను సహాయ బృందాలను పంపినట్టు చంద్రబాబు గుర్తు చేశారు.

కేంద్ర ప్రభుత్వానికి తాజా సమాచారం అందిస్తున్నట్టు ఆయన తెలిపారు. కేంద్ర హోంమంత్రి అమిత్ షాతో టచ్‌లో ఉన్నట్టు, ఆ రోజు సాయంత్రమే ఇంటరిం రిపోర్ట్ పంపినట్టు చెప్పారు. కేంద్ర కమిటీ నిన్న తనను కలిసినట్టు ఆయన వివరించారు.

తుఫాన్ వల్ల ₹4,560 కోట్ల నష్టం జరిగినట్టు కేంద్ర కమిటీకి నివేదిక ఇచ్చినట్టు చంద్రబాబు చెప్పారు. ఆ నివేదికతో కమిటీ ఢిల్లీకి వెళ్లనున్నట్టు ఆయన తెలిపారు.