వర్షాకాలం ముందు ప్రజారోగ్య సంసిద్ధతపై మంత్రి దామోదర రాజనరసింహ సమీక్ష

హైదరాబాద్‌లోని రాజు ఆరోగ్యశ్రీ హెల్త్ కేర్ ట్రస్ట్ కార్యాలయంలో రాష్ట్ర వైద్య, ఆరోగ్య శాఖ మంత్రి దామోదర రాజనరసింహ సోమవారం ఉన్నతస్థాయి సమీక్ష నిర్వహించారు. వర్షాకాలం సమీపిస్తున్న నేపథ్యంలో ప్రజారోగ్య పరిరక్షణకు తీసుకోవాల్సిన చర్యలపై ఆయన అధికారులతో చర్చించారు.

ప్రజా ఆరోగ్యానికి ప్రభుత్వం అత్యంత ప్రాధాన్యత ఇస్తోందని మంత్రి తెలిపారు. ప్రతి జిల్లా యంత్రాంగం ముందస్తు ప్రణాళికతో పనిచేస్తూ పరిస్థితిని నిరంతరం పర్యవేక్షించాలని ఆదేశించారు. సీజనల్ వ్యాధుల లక్షణాలతో వచ్చే ప్రతి వ్యక్తికీ వెంటనే పరీక్షలు నిర్వహించి చికిత్స అందించాలన్నారు.

ఎక్కడైనా వ్యాధుల క్లస్టర్లు ఏర్పడితే వాటిని గుర్తించి వ్యాప్తిని నియంత్రించేందుకు రాపిడ్ రెస్పాన్స్ టీమ్‌లు పూర్తి స్థాయిలో పనిచేయాలని సూచించారు. దోమల నివారణకు మున్సిపల్, పంచాయతీ రాజ్ శాఖల సమన్వయంతో నిల్వ నీటి తొలగింపు, లార్వా నిర్మూలన, ఫాగింగ్, ఫీవర్ సర్వేలు నిరంతరం కొనసాగించాలన్నారు. ప్రతి శుక్రవారం నిర్వహించే డ్రైడే కార్యక్రమాన్ని క్షేత్రస్థాయిలో సమర్థవంతంగా అమలు చేయాలని ఆదేశించారు.

పబ్లిక్ హెల్త్ డైరెక్టర్ డాక్టర్ రవీంద్ర నాయక్ సీజనల్ వ్యాధుల గణాంకాలు, జిల్లాల వారీ కేసుల వివరాలను మంత్రికి వివరించారు. ప్రతి కేసును అప్రమత్తంగా పర్యవేక్షించాలని, జిల్లాల వారీ వీక్లీ రిపోర్టులు ప్రభుత్వానికి పంపాలని మంత్రి ఆదేశించారు.

ప్రజలు తమ ఇంటి పరిసరాలను పరిశుభ్రంగా ఉంచుకోవాలని, నీరు నిల్వ ఉండకుండా చూసుకోవాలని, జ్వరం వంటి లక్షణాలు కనిపిస్తే వెంటనే ప్రభుత్వ ఆస్పత్రిని సంప్రదించాలని మంత్రి విజ్ఞప్తి చేశారు.