కర్నూలు: ఎమ్మిగనూరులో భారీగా అక్రమ గ్రావెల్ తవ్వకాలు; అధికారుల నిర్లక్ష్యంపై ఆరోపణ

కర్నూలు జిల్లా ఎమ్మిగనూరు నియోజకవర్గంలో పెద్ద ఎత్తున అక్రమ గ్రావెల్ తవ్వకాలు కొనసాగుతున్నాయి. పాలమరసు కొండ, గుడికల్ కొండ, రాగిమాన్ దొడ్డి తిప్ప, బనవాసి అటవీ ప్రాంతం, నందవరం మండలం గంగవరం తదితర ప్రాంతాల్లో ఈ తవ్వకాలు విస్తృతంగా జరుగుతున్నాయి.

ఏ విధమైన రాయల్టీ చెల్లించకుండా ఎర్రమట్టి, గ్రావెల్ లాంటి వనరులను తవ్వి తరలిస్తున్నారు. ప్రభుత్వానికి కోట్లాది రూపాయలు నష్టం వాటిల్లుతోంది. రాత్రివేళల్లో ఎక్కువగా రవాణా జరుగుతోంది. ఒక టిప్పర్ లోడును రూ.8,000 నుంచి రూ.10,000 వరకు విక్రయిస్తున్నారు.

ఈ తవ్వకాల వెనుక స్థానిక నాయకుల ప్రమేయం ఉన్నట్టు ఆరోపణలు వినిపిస్తున్నాయి. అధికారులు తనిఖీ చేసినా కేసులు నమోదు చేయడం లేదు. గుడికల్ కొండ వద్ద అధికారులు తనిఖీ చేసినా కేసు పెట్టలేదని తెలుస్తోంది. గంజిహళ్ళ చెరువు వద్ద అక్రమ తవ్వకాలను స్థానికులు అడ్డుకోగా, వారిపైనే కేసులు నమోదు చేశారు.

ఇప్పటికే ఈ ప్రాంతాల్లో కొండలు తగ్గిపోయి పెద్ద గుంతలు ఏర్పడ్డాయి. ప్రభుత్వం ఈ వ్యవహారాన్ని తీవ్రంగా పరిగణించకపోతే పరిస్థితి మరింత దిగజారే ప్రమాదం ఉందని స్థానికులు ఆందోళన వ్యక్తం చేస్తున్నారు.