ఢిల్లీలో వాయు కాలుష్యం ప్రమాదకర స్థాయికి; AQI 400 పాయింట్లు

దేశ రాజధాని ఢిల్లీలో వాయు కాలుష్యం ప్రమాదకర స్థాయికి చేరింది. ఢిల్లీలో గాలి నాణ్యత సూచిక (AQI) 400 పాయింట్ల స్థాయిలో నమోదవుతోంది. నగరంలోని ఒక మానిటరింగ్ స్టేషన్ వద్ద 380 పాయింట్లు నమోదైనట్టు ఢిల్లీ పొల్యూషన్ కంట్రోల్ బోర్డు వివరాలు తెలుపుతున్నాయి.

చలికాలం ప్రారంభం కాకముందే ఈ పరిస్థితి ఏర్పడింది. ఉదయం బయటకు వచ్చినప్పుడు పొగమంచు లాగా కాలుష్యం కనిపిస్తోంది. రోడ్లపై కొద్ది దూరంలో ఉన్న వాహనాలు, భవనాలు కూడా స్పష్టంగా కనిపించడం లేదు. రాష్ట్రపతి భవన్‌కు పావు కిలోమీటర్ దూరంలో ఉన్నా దృశ్యం స్పష్టంగా కనిపించడం లేదని ఆ ప్రాంతం నుంచి వచ్చిన సమాచారం తెలుపుతోంది.

ఏడాది పొడవునా వాహనాలు, పరిశ్రమలు, నిర్మాణ పనులు కాలుష్యాన్ని పెంచుతున్నాయి. చలికాలంలో ఢిల్లీ భౌగోళిక, వాతావరణ పరిస్థితుల కారణంగా కాలుష్య కణాలు భూమికి దగ్గరగా చేరుతాయి. దీంతో పరిస్థితి మరింత దిగజారుతోంది.

ఈ కాలుష్యం వల్ల ఆసుపత్రులకు వచ్చే వారి సంఖ్య పెరిగిందని బ్రిగేడియర్ డాక్టర్ రమేష్ తెలిపారు. శ్వాసకోశ సమస్యలు, అలర్జీలు, తుమ్ములు, దగ్గు, బ్రాంకైటిస్, ఆస్తమా లాంటి సమస్యలు ఎక్కువగా కనిపిస్తున్నాయని ఆయన చెప్పారు. పిల్లల ఊపిరితిత్తులు సున్నితంగా ఉంటాయని, వృద్ధుల్లో ఇమ్యూనిటీ తక్కువగా ఉండటంతో ఎక్కువ ప్రభావం పడుతుందని ఆయన వివరించారు. డయాబెటిస్, బ్లడ్ ప్రెషర్ ఉన్న వారిలో ఇబ్బంది ఎక్కువగా ఉంటుందని తెలిపారు. దీర్ఘకాలంలో ఇది కళ్లు, గుండె, చర్మంపై కూడా ప్రభావం చూపుతుందని ఆయన అన్నారు.

మాస్కులు ధరించాలని, ఆవిరి పట్టడం (స్టీమ్ ఇన్హలేషన్) చేయాలని డాక్టర్ రమేష్ సూచించారు. కాలుష్యం ఎక్కువగా ఉన్న సమయాల్లో ఉదయం, సాయంత్రం వాకింగ్ తగ్గించాలని చెప్పారు. అవసరం లేని ప్రయాణాలు మానుకోవాలని, సమస్య కనిపిస్తే ముందే డాక్టర్‌ను సంప్రదించాలని సూచించారు. శ్వాస సంబంధ సమస్యలు ఉన్న వారు వీలైతే తక్కువ కాలుష్యం ఉన్న ప్రాంతాలకు వెళ్లడం మంచిదని ఆయన అన్నారు.

ఢిల్లీలో GRAP కింద నియంత్రణ చర్యలు అమలు చేస్తున్నారు. నగరంలో దాదాపు 60 పొల్యూషన్ మానిటరింగ్ స్టేషన్లు ఉన్నాయి. ఇవి PM2.5, PM10, NO2, SO2, CO, ఓజోన్, అమ్మోనియా, లెడ్ పరిమాణాన్ని పరిశీలిస్తాయి. సగటు AQI ఆధారంగా కాకుండా ప్రాంతాల వారీగా చర్యలు తీసుకోవాలని సుప్రీం కోర్టు సూచించింది. ఢిల్లీ లోకి వచ్చే వాహనాలను టోల్‌గేట్ల వద్ద తనిఖీ చేస్తున్నారు.

దీపావళి తర్వాత AQI 500 పాయింట్లను దాటే అవకాశం ఉందని అంచనా వేస్తున్నారు. పెద్ద ఎత్తున టపాసులు కాలిస్తే కాలుష్యం మరింత పెరుగుతుందని డాక్టర్లు హెచ్చరిస్తున్నారు. టపాసులు కాల్చే పండుగను ఏడాదిలో మరో సమయానికి మార్చాలని డాక్టర్ రమేష్ సూచించారు.