ఢిల్లీలో వాయు కాలుష్యం తీవ్రం.. పలు ప్రాంతాల్లో AQI 400 దాటింది

ఢిల్లీలో వాయు కాలుష్యం తీవ్ర స్థాయికి చేరింది. నగరంలోని పలు ప్రాంతాల్లో ఉదయం నుంచే Air Quality Index (AQI) 400 మార్కును దాటింది. ప్రపంచంలోనే అత్యంత కాలుష్య నగరంగా పేరుపొందిన ఢిల్లీలో ఈసారి పరిస్థితి మరింత దారుణంగా మారింది.

కేంద్ర కాలుష్య నియంత్రణ మండలి (CPCB) ఉదయం తెలిపిన గణాంకాల ప్రకారం నగర సగటు AQI 369గా నమోదైంది. ఇది 'సివియర్' విభాగంలో ఉంది. IIT ఢిల్లీ పరిసరాల్లో అత్యధికంగా 426 AQI నమోదైంది. నరేలాలో 417, ITO ప్రాంతంలో 415 AQI నమోదైంది.

ద్వారక, జాఫర్‌పూర్, కామన్‌వెల్త్ స్పోర్ట్స్ కాంప్లెక్స్, ఢిల్లీ యూనివర్సిటీ నార్త్ క్యాంపస్ ప్రాంతాల్లోనూ కాలుష్యం తీవ్రంగానే ఉందని అధికారులు తెలిపారు. ఢిల్లీ అంతర్జాతీయ విమానాశ్రయం సమీపంలో 350 నుంచి 360 వరకు AQI నమోదైంది.

దీపావళి తర్వాత టపాసుల పొగ, వాహనాల ఎగ్జాస్ట్, హర్యానా, పంజాబ్‌లో పంట వ్యర్థాల దహనం, నిర్మాణ పనుల ధూళి కారణంగా కాలుష్యం పెరిగిందని అధికారులు చెప్తున్నారు. చలికాలంలో గాలి కదలిక తక్కువగా ఉండటంతో కాలుష్యం ఒకే చోట నిలిచిపోతోంది.

PM2.5 స్థాయిలు ప్రమాదకర స్థాయిలో ఉన్నాయి. 10 ఏళ్లలోపు పిల్లలు, 60 ఏళ్లు పైబడిన వృద్ధులు, శ్వాసకోశ, గుండె సంబంధిత సమస్యలతో బాధపడుతున్న వారికి ఇబ్బంది ఎక్కువగా ఉంటుందని అధికారులు హెచ్చరికలు జారీ చేశారు.

ఢిల్లీ ప్రభుత్వం, NCR ప్రాంతాల్లో కాలుష్య నియంత్రణ చర్యలు చేపట్టినా తగ్గుముఖం పట్టలేదు. దీపావళి తర్వాత ఐదు రోజులుగా ఢిల్లీలో ఇదే పరిస్థితి కొనసాగుతోంది.