రాజస్థాన్ రైల్వే ట్రాక్ పేలుడు కేసు: ISI లింక్‌లతో ఇద్దరు అరెస్ట్

రాజస్థాన్‌లో రైల్వే ట్రాక్‌పై జరిగిన పేలుడు కేసులో పాకిస్తాన్ ISI హ్యాండ్లర్లతో సంబంధాలు ఉన్నట్లు గుర్తించిన ఓ యువతితో సహా ఇద్దరిని పోలీసులు అరెస్టు చేశారు. రాజస్థాన్ యాంటీ టెర్రర్ స్క్వాడ్ (ATS) నిర్వహించిన ఆపరేషన్‌లో పంజాబ్ పోలీసులు వీరిని అదుపులోకి తీసుకున్నారు.

అరెస్టు అయిన వారిలో 21 ఏళ్ల మహక్‌దీప్ కౌర్, 22 ఏళ్ల దవీందర్ సింగ్ ఉన్నారు. కౌర్ నుంచి రెండు తుపాకులు, బులెట్లు, ₹30,000 నగదు స్వాధీనం చేసుకున్నట్లు పోలీసులు తెలిపారు. పాకిస్తాన్ ISI హ్యాండ్లర్లు షా, చాచా అనే ఇద్దరితో ఆమెకు సంబంధాలు ఉన్నట్లు గుర్తించారు.

డ్రగ్స్ కేసులో ఆమె భర్త జైలుకు వెళ్లడంతో కౌర్ ఒంటరిగా ఉండేది. ఈ పరిస్థితిని ఉపయోగించుకున్న ISI ఏజెంట్లు ప్రేమ సందేశాలు పంపి, డబ్బు ఆశ చూపి ఆమెను వలలోకి దించినట్లు పోలీసులు వెల్లడించారు.

నవంబర్ నెలలో శ్రీగంగానగర్‌లో రైల్వే ట్రాక్‌పై చోటు చేసుకున్న పేలుడులో రెండు రైల్వే స్లీపర్లు ధ్వంసమయ్యాయి. సుమారు రెండున్నర అడుగుల లోతైన గొయ్యి ఏర్పడింది.

నిందితులకు ఆశ్రయం, బైక్ సమకూర్చిన మరో ముగ్గురిని కూడా పోలీసులు అదుపులోకి తీసుకున్నారు.