సైబర్ మోసాల నియంత్రణకు ఏఐ సేవలు విస్తరించాలని డీజీపీ సూచన

తెలంగాణలో సైబర్ మోసాలు నియంత్రణకు పెద్ద సవాలుగా మారాయని డీజీపీ సీవీ ఆనంద్ హెచ్చరించారు. సైబర్ నేరాలతో కుటుంబాలు జీవితకాల సంపాదన కోల్పోతున్నాయని ఆయన ఆవేదన వ్యక్తం చేశారు.

తెలంగాణ సైబర్ సెక్యూరిటీ బ్యూరో కార్యాలయంలో ఆయన సమీక్ష సమావేశం నిర్వహించారు. సైబర్ ల్యాబ్‌లు, సెక్యూరిటీ ఆపరేషన్ సెంటర్, డిజిటల్ ఫోరెన్సిక్ విభాగాలను స్వయంగా పరిశీలించారు. బ్యూరో డైరెక్టర్ శిఖా గోయల్ ఐపీఎస్ ఆధునిక సాంకేతికత, దర్యాప్తు విధానాలను వివరించారు.

బాధితురాలు ఫిర్యాదు చేయగానే ఏఐ వ్యవస్థ వెంటనే స్పందించి, ధైర్యం చెప్పి, వివరాలు సేకరించి, సంబంధిత పోలీస్ స్టేషన్‌కు ఆటోమేటిక్‌గా సమాచారం చేరే విధానాన్ని డీజీపీ ప్రశంసించారు. ప్రజలకు వేగవంతమైన సేవలు అందించేందుకు ఏఐ సేవలను విస్తరించాలని ఆయన సూచించారు.