మన ఇండియన్ క్రికెట్ టీమ్ ఆడే స్పోర్ట్స్‌వేర్ బ్రాండ్‌ను ఎవరు తయారు చేస్తున్నారో తెలుసా?

సీనియర్ ఇండియన్ క్రికెట్ టీమ్ మన దేశం తరఫున T20 వరల్డ్ కప్ వంటి ప్రతిష్ఠాత్మక టోర్నమెంట్‌లలో ఆడినప్పుడు వారు ధరించే స్పోర్ట్స్‌వేర్ ఒక స్వదేశీ బ్రాండ్ అని మీకు తెలుసా? ఆ బ్రాండ్ పేరు అథ్లెటిక్ డ్రైవ్. ఈ బ్రాండ్ వ్యవస్థాపకుడు ధీరజ్ ఝా ఇటీవల ఓ కార్యక్రమంలో తన బ్రాండ్ ప్రయాణం గురించి ఆసక్తికర విషయాలు పంచుకున్నారు. 2004 నుంచి వస్త్రాలు ఎగుమతి చేస్తున్న ఝా, 2018లో ప్రధాని నరేంద్ర మోదీ 'మేక్ ఇన్ ఇండియా' కార్యక్రమం నుంచి స్ఫూర్తి పొంది ఈ బ్రాండ్‌ను ప్రారంభించారు. గోల్ఫ్ నుంచి ప్రారంభమైన ఈ బ్రాండ్ నేడు క్రికెట్, బ్యాడ్మింటన్, బాస్కెట్‌బాల్, పికిల్‌బాల్ తదితర అన్ని రకాల క్రీడలకు దుస్తులు తయారు చేస్తోంది. ఒక ఇండియన్ బ్రాండ్‌గా అంతర్జాతీయ నాణ్యతా ప్రమాణాలను అందుకోవడం ప్రారంభంలో పెద్ద సవాల్‌గా ఉండేదని ఆయన గుర్తు చేసుకున్నారు. 'ఇండియన్ బ్రాండ్ అంటే జనాలు నాణ్యత విషయంలో నమ్మలేదు. కానీ ఒకసారి నాణ్యమైన ప్రోడక్ట్ డెలివరీ ఇస్తే ఎవరూ ఆపలేరు' అని ఆయన తన విజయ రహస్యాన్ని పంచుకున్నారు. వ్యాపారంలో హ్యూమన్ రిసోర్స్ అతి పెద్ద ఆస్తి అని, వారిని మానవత్వంతో చూసుకోవడం తన లీడర్‌షిప్ సూత్రమని వివరించారు. కరోనా మహమ్మారి తర్వాత ప్రజలు బహిరంగ క్రీడల వైపు ఎక్కువగా ఆకర్షితులవుతున్నారని ఆయన అభిప్రాయపడ్డారు. కొత్తగా వ్యాపారం ప్రారంభించాలనుకునే యువతకు ప్రాథమిక ఉత్పత్తి పరిజ్ఞానం చాలా ముఖ్యమని ఆయన సలహా ఇచ్చారు.