వినాయక చవితికి దూల్పేటలో విగ్రహాల ముందస్తు బుకింగ్‌లు ఊపందుకున్నాయి

హైదరాబాద్‌లోని దూల్పేట ప్రాంతం వినాయక చవితి ముందస్తు బుకింగ్‌లతో సందడిగా మారింది. పండుగకు నెలన్నర సమయం మాత్రమే ఉండటంతో, గణేష్ ఉత్సవ కమిటీలు ప్రత్యేకమైన విగ్రహాల కోసం దూల్పేటలోని తయారీ షాపులకు క్యూ కడుతున్నాయి.

దూల్పేటలో అనేక రకాల డిజైన్లు, తక్కువ ధరలకు వినాయక విగ్రహాలు లభిస్తాయి. ఉత్తర ప్రదేశ్, రాజస్థాన్, బీహార్, మహారాష్ట్ర వంటి రాష్ట్రాల నుంచి వచ్చిన కార్మికులు ఇక్కడ పని చేస్తారు. 20-25 అడుగుల ఎత్తైన విగ్రహాల వరకు తయారు చేస్తారని వ్యాపారులు తెలిపారు.

చాలా కమిటీలు ఇప్పటికే 2-3 నెలల ముందే బుకింగ్ చేసుకున్నాయి. తెలంగాణలోని వరంగల్, ఖమ్మం, కరీంనగర్, హైదరాబాద్, సికింద్రాబాద్ నుండే కాకుండా ఆంధ్రప్రదేశ్ లోని గుంటూరు, కర్నూలు, నెల్లూరు జిల్లాల నుంచి కూడా గణేష్ విగ్రహాల కోసం దూల్పేటకు వస్తుంటారని షాపు యజమానులు చెప్పారు.

శైలింగంపల్లి యూత్ కమిటీ నిర్వాహకుడు మాట్లాడుతూ, '25 ఏళ్లుగా ఇక్కడి నుంచే వినాయకుడిని తీసుకుంటున్నాం. రెండు నెలల క్రితమే బుకింగ్ చేశాం. ఇప్పుడు డిమాండ్ ఎక్కువగా ఉండడంతో విగ్రహాలు దొరకడం కష్టంగా మారింది' అన్నారు.

1 అడుగు నుండి 25 అడుగుల వరకు విగ్రహాలు లభ్యమవుతాయి. ఈసారి కొత్త డిజైన్లు, ఫైబర్ విగ్రహాలు ఎక్కువగా అడుగుతున్నారని తయారీదారులు వివరించారు. ధరలు గతంతో పోలిస్తే కొంచెం ఎక్కువైనా, తక్కువ బడ్జెట్‌లోనే రంగురంగుల మూర్తులు దొరుకుతాయని వారు పేర్కొన్నారు.

దూల్పేటలో మహారాష్ట్ర స్థాయి పెయింటింగ్ నాణ్యత ఉండడంతో ఇది తెలంగాణలో ప్రధాన విగ్రహాల మార్కెట్‌గా నిలిచింది. ఇక్కడి కళాకారులు ప్రత్యేకమైన డిజైన్లు చేస్తారని స్థానికులు చెప్పారు. ఈ ప్రాంతంలో చాలా కుటుంబాలు విగ్రహాల తయారీపైనే జీవనం సాగిస్తున్నాయి.