డ్రోగో డ్రోన్స్ డ్రోగో ఏరోస్పేస్‌గా రూపాంతరం; 500 ఉద్యోగాలు, ఆర్మీకి తొలి డ్రోన్ల సరఫరా

హైదరాబాద్‌లోని మాదాపూర్ కేంద్రంగా పనిచేస్తున్న డ్రోగో డ్రోన్స్ తన పేరును డ్రోగో ఏరోస్పేస్ ప్రైవేట్ లిమిటెడ్‌గా మార్చుకుంది. ఈ సందర్భంగా సంస్థ 500 మందికి ఉపాధి కల్పించనున్నట్లు ప్రకటించింది.

భారత సైన్యం నుంచి ₹72 కోట్ల విలువైన డ్రోన్ ఆర్డర్ అందుకున్న ఈ సంస్థ, తొలి విడతగా 41 JK-250E డ్రోన్లను నాసిక్‌లోని సదరన్ కమాండ్ అధికారులకు అందజేసింది. మిగిలిన డ్రోన్ సరఫరాను వచ్చే ఏడాది ఆగస్టు నాటికి పూర్తి చేయాలని సంస్థ లక్ష్యంగా పెట్టుకుంది.

ఒకసారి ఛార్జింగ్ చేస్తే మూడు గంటల పాటు ఆకాశంలో ఎగిరే ఈ డ్రోన్లు నిఘా, ఇతర సైనిక అవసరాలకు ఉపయోగపడతాయి. కేంద్ర ప్రభుత్వ Make in India, Atmanirbhar Bharat కార్యక్రమాలకు ఈ ప్రాజెక్ట్ సహకారం అందిస్తుందని సంస్థ తెలిపింది.

డ్రోగో ఏరోస్పేస్ వ్యవస్థాపకుడు, CEO యశ్వంత్ మాట్లాడుతూ, కేవలం డ్రోన్ తయారీకే పరిమితం కాకుండా భవిష్యత్తు రక్షణ అవసరాలకు అనుగుణంగా మానవరహిత వైమానిక వ్యవస్థలు, ఉపగ్రహాలు, అంతరిక్ష నౌకల రూపకల్పనపై దృష్టి పెడతామని చెప్పారు.