ఎల్ నినో నేపథ్యంలో దుమ్ముగూడెం ఆనకట్ట ఎత్తు ఒక మీటర్ పెంపు

ఎల్ నినో ప్రభావంతో రాబోయే వేసవిలో తాగునీటి కష్టాలు రాకుండా తెలంగాణ ప్రభుత్వం ముందస్తు చర్యలు చేపట్టింది. భద్రాద్రి కొత్తగూడెం జిల్లాలో గోదావరిపై ఉన్న దుమ్ముగూడెం ఆనకట్ట ఎత్తును ఒక మీటర్ పెంచే పనులు ప్రారంభమయ్యాయి.

ఆనకట్టపై ఒక మీటర్ ఎత్తులో ఇసుక బస్తాలను అమరుస్తున్నారు. దీని ద్వారా అదనంగా ఒక టీఎంసీ నీటిని నిల్వ చేయవచ్చని ప్రభుత్వం భావిస్తోంది. నీటిపారుదల శాఖ మంత్రి తుమ్మల నాగేశ్వరరావు ఆనకట్ట వద్దకు వెళ్లి పనులను పరిశీలించారు. ఇసుక బస్తాలతో ఒక మీటర్ ఎత్తు పెంచితే ఒక టీఎంసీ నీరు నిల్వ చేయవచ్చని ఆయన తెలిపారు. అవసరమైతే మరో అర మీటర్ కూడా పెంచవచ్చని ఆయన అన్నారు.

గోదావరిపై అశ్వాపురం దగ్గర ఉన్న ఈ ఆనకట్టను 150 సంవత్సరాల క్రితం సర్ ఆర్థర్ కాటన్ నిర్మించారు. ఆనకట్ట పొడవు 1,564.50 మీటర్లు. గరిష్ఠ ఎత్తు 49.50 మీటర్లు కాగా, డెడ్ స్టోరేజీ లెవల్ 36 మీటర్లు. 35,000 క్యూసెక్కుల వరద రాగా అలుగు పోయేలా దీన్ని డిజైన్ చేశారు. నిల్వ సామర్థ్యం 8 టీఎంసీలుగా ఉండేది.

కాలక్రమంలో ఒండ్రు ఇసుక కారణంగా నిల్వ సామర్థ్యం తగ్గిపోయింది. ప్రస్తుతం 1.20 టీఎంసీ నీరు మాత్రమే నిల్వ ఉంది. ఆనకట్ట నుంచి రోజూ 150 MLD నీటిని సరఫరా చేస్తున్నారు. ఈ నీటిని తాగునీటి అవసరాలకే వాడితే ఎనిమిది నెలల వరకు సరిపోతుందని అధికారులు చెప్తున్నారు. కానీ వరద ప్రవాహం తగ్గి ఎండలు మొదలైతే ఒక నెలలోనే నీరు డెడ్ స్టోరేజీ లెవల్ 0.45 టీఎంసీకి పడిపోయే అవకాశం ఉంది. అప్పుడు ఫిబ్రవరి, మార్చి నాటికే తాగునీటికి ఇబ్బంది వచ్చే పరిస్థితి ఏర్పడుతుంది.

దుమ్ముగూడెం ఆనకట్ట కింద సీతమ్మ సాగర్ ప్రాజెక్టు పనులు మధ్యలోనే ఆగిపోయాయి. ఆ ప్రాజెక్టు పూర్తయితే 38 టీఎంసీల నీరు నిల్వ చేయవచ్చు. ఈ నీటి నిల్వ ద్వారా ఖమ్మం, భద్రాద్రి కొత్తగూడెం, మహబూబాబాద్ జిల్లాలకు మిషన్ భగీరథ ద్వారా తాగునీరు అందుతుంది. సుమారు 10,500 ఎకరాలకు సాగునీరు అందుతుంది. హెవీ వాటర్ ప్లాంట్, బీటీపీఎస్, ఐటీసీ పేపర్ బోర్డ్ తో పాటు 11 ఎత్తిపోతల పథకాలకు కూడా ఈ నీరు ఉపయోగపడుతుంది.

ఎల్ నినో ప్రభావం తీవ్రంగా ఉండొచ్చని మంత్రి తుమ్మల నాగేశ్వరరావు అన్నారు. ఆనకట్ట ఎత్తు పెంపు పనులు ప్రస్తుతం కొనసాగుతున్నాయి.