E20 పెట్రోల్‌పై వెనక్కి తగ్గేది లేదని కేంద్రం స్పష్టీకరణ; ఆప్ నిరసన

E20 పెట్రోల్ విషయంలో వెనక్కి తగ్గేది లేదని కేంద్ర ప్రభుత్వం రాజ్యసభలో స్పష్టం చేసింది. AAP ఎంపీ సంజయ్ సింగ్ అడిగిన ప్రశ్నకు కేంద్రం రాతపూర్వకంగా సమాధానం ఇచ్చింది.

ఇథనాల్ బ్లెండ్ చేసిన పెట్రోల్ను ఆప్షనల్‌గా ఇవ్వడం సాధ్యం కాదని కేంద్రం తెలిపింది. ఒకేసారి విడివిడిగా పెట్రోల్ సప్లై చేయడం వల్ల రవాణా సమస్యలు వస్తాయని వివరించింది. నీతి ఆయోగ్, వాహన తయారీదారులు, ఆయిల్ మార్కెటింగ్ కంపెనీలతో చర్చించి ఈ నిర్ణయం తీసుకున్నామని చెప్పింది.

E20 పెట్రోల్‌లో అధిక ఆక్టేన్ కారణంగా మంచి యాక్సిలరేషన్ లభిస్తుందని, ఇథనాల్ బ్లెండింగ్ వల్ల వాహనాలు పాడైనట్లు ఎలాంటి ఆధారాలు లేవని కేంద్రం వివరించింది. దేశవ్యాప్తంగా ఇంధన నాణ్యతను నిరంతరం పర్యవేక్షిస్తున్నట్లు తెలిపింది. 87,000కు పైగా పెట్రోల్ బంకుల్లో రోజుకు 8 నుంచి 12 సార్లు కల్తీ పరీక్షలు జరుగుతున్నాయని, క్లోరైడ్, సల్ఫైడ్ కలుషితాలను గుర్తించేందుకు 2000కు పైగా ఇంధన నమూనాలను ప్రత్యేకంగా పరీక్షించినట్లు వెల్లడించింది.

మరోవైపు, E20 పెట్రోల్‌కు వ్యతిరేకంగా ఆమ్‌ ఆద్మీ పార్టీ నిరసనలు చేపట్టింది. ఆప్ నేతలు ప్రధాని నివాసానికి ర్యాలీగా వెళ్లగా పోలీసులు అడ్డుకున్నారు. అరవింద్ కేజ్రీవాల్, మనీష్ సిసోడియా, సంజయ్ సింగ్ సహా నేతలు రోడ్డుపై బైఠాయించి నిరసన తెలిపారు. రెండు లక్షలకు పైగా సంతకాలు సేకరించి ప్రధానికి ఇవ్వాలని ఆప్ ప్రయత్నించింది.