Eagle Force ఆపరేషన్‌లో అంతర్జాతీయ డ్రగ్స్ రాకెట్ ఛేదన; రూ.12 కోట్ల హైడ్రోపోనిక్ గంజాయి స్వాధీనం

Eagle Force బృందం DRI, కస్టమ్స్, రైల్వే పోలీసులు, షోలాపూర్ కమిషనరేట్ సహకారంతో అంతర్జాతీయ డ్రగ్స్ రాకెట్‌ను ఛేదించింది. తాజాగా నిర్వహించిన ఈ ఆపరేషన్‌లో రూ.12 కోట్ల విలువైన హైడ్రోపోనిక్ గంజాయిని స్వాధీనం చేసుకున్నారు.

జనవరి 29 నాడు జావేద్ అనే వ్యక్తి హైదరాబాద్ వచ్చినట్లు గుర్తించిన Eagle Force అధికారులు నిఘా పెంచారు. జావేద్, చాంద్ షేక్, రఫీక్, యూసుఫ్ అన్సారీ, సూరజ్‌పాల్, సయ్యద్ జకారియా తదితరులు ఈ రాకెట్‌లో కీలకంగా వ్యవహరించారని తేలింది. బ్యాంకాక్ నుంచి గంజాయి ముంబయికి సరఫరా చేస్తుండగా, హైదరాబాద్ మీదుగా రవాణా చేస్తున్నట్లు గుర్తించారు.

ఈ క్రమంలో ఆర్.సి.పురంలో సందీప్ బాస్వాని వద్ద 13 కిలోల గంజాయి పట్టుబడింది. తర్వాత షంషాబాద్ నుంచి నాంపల్లి రైల్వే స్టేషన్‌కు చాంద్ షేక్ తీసుకెళ్లిన గంజాయి ట్రాలీని గుర్తించారు. నిందితులు పోలీసులను తప్పుదోలేందుకు హుస్సేన్ సాగర్ ఎక్స్‌ప్రెస్‌లో ప్రయాణం చేస్తున్నట్లుగా నటించారు. అయితే Eagle Force, షోలాపూర్ పోలీసుల సమన్వయంతో వారిని పట్టుకున్నారు.

గుజరాత్‌కు చెందిన అబ్దుల్ దాల్ అనే ఏజెంట్ హైదరాబాద్ ఎయిర్‌పోర్ట్‌లో అరెస్టు కాగా, అతని ఫోన్‌లో AI తో సృష్టించిన కస్టమ్స్ అధికారి ఫొటోలు లభించాయి. మొత్తం 50 మంది Eagle Force సిబ్బంది ఈ ఆపరేషన్‌లో పాల్గొన్నారు. నిందితులపై కేసు నమోదు చేసి దర్యాప్తు కొనసాగిస్తున్నారు.