SIR ప్రక్రియపై సుప్రీం కోర్టులో ECI కౌంటర్ అఫిడవిట్ దాఖలు

భారత ఎన్నికల సంఘం (ECI) ఓటర్ల జాబితా ప్రత్యేక సమగ్ర సవరణ (SIR) ప్రక్రియపై వచ్చిన ఆరోపణలను సుప్రీం కోర్టులో దాఖలు చేసిన కౌంటర్ అఫిడవిట్ ద్వారా ఖండించింది. ప్రధాన ఎన్నికల కమిషనర్ జ్ఞానేష్ కుమార్ ఏకపక్షంగా నిర్ణయాలు తీసుకున్నారన్న ఆరోపణలో ఎలాంటి నిజం లేదని ECI స్పష్టం చేసింది.

SIR కు సంబంధించి జూన్ 2025, అక్టోబర్ 2025, మే 2026 లో జారీ చేసిన మూడు ఉత్తర్వులను ముగ్గురు సభ్యుల ఎన్నికల సంఘం ఏకగ్రీవంగా ఆమోదించిందని అఫిడవిట్ లో తెలిపింది. CEC జ్ఞానేష్ కుమార్ తో పాటు కమిషనర్లు సుగ్బీర్ సింగ్ సంధు మరియు వివేక్ జోషి ముగ్గురూ కలిసి ఈ అఫిడవిట్ ను ఉమ్మడిగా ఆమోదించారని న్యాయస్థానానికి తెలిపింది.

ఫైల్ ప్రాసెసింగ్ సమయంలో కమిషనర్ల వ్యక్తిగత సూచనలు, ప్రశ్నలు లేదా భిన్నాభిప్రాయాలు అంతర్గత సూచనల కిందికే వస్తాయని, అంతిమంగా తీసుకునే నిర్ణయాలు ఎల్లప్పుడూ సమిష్టిగానే ఉంటాయని ECI వివరించింది. అలాగే ఓటర్ నమోదుకు ఉద్దేశించిన ఫార్మ్ సిక్స్ లో ఎలాంటి మార్పులు చేయలేదని కూడా స్పష్టం చేసింది.

ప్రతిపక్ష పార్టీలు SIR ప్రక్రియలో అవకతవకలు జరిగాయని ఆరోపిస్తూ సుప్రీం కోర్టులో పిటిషన్లు దాఖలు చేశాయి. ఈ పిటిషన్లపై విచారణ చేపట్టిన సుప్రీం కోర్టు కేంద్ర ప్రభుత్వానికి మరియు ఎన్నికల సంఘానికి నోటీసులు జారీ చేసింది. సుప్రీం కోర్టు ఆదేశాల మేరకు ECI తాజాగా ఈ అఫిడవిట్ దాఖలు చేసింది. CEC పై వచ్చిన ఆరోపణలు కేవలం ఒకే ఒక మీడియా నివేదిక ఆధారంగా వచ్చాయని, వాటికి ఎలాంటి ఆధారాలు లేవని ECI పేర్కొంది.