ఆషాఢ తొలి ఆదివారం ఏడుపాయల వనదుర్గా భవానికి శాకాంబరి అలంకారం

ఆషాఢ మాసం తొలి ఆదివారం నాడు, తెలంగాణలోని ఏడుపాయల శ్రీ వనదుర్గా భవాని అమ్మవారు శాకాంబరి దేవి అలంకారంలో భక్తులకు దర్శనమిచ్చారు.

అమ్మవారికి తెల్లవారుజామున సుప్రభాత సేవ, పంచామృత అభిషేకం నిర్వహించారు. కూరగాయలతో అమ్మవారిని సుందరంగా అలంకరించి మహాహారతి ఇచ్చారు. ఆషాఢ మాసంలో శాకాంబరి దేవిగా అలంకరించడం వల్ల కాలానుగుణ వ్యాధులు తొలగి, ఆరోగ్యం, సుఖసంతోషాలు కలుగుతాయని అర్చకులు తెలిపారు.

ఈ ప్రత్యేక దర్శనానికి తెలంగాణ, ఆంధ్రప్రదేశ్, కర్ణాటక, మహారాష్ట్ర నుంచి భక్తులు అధిక సంఖ్యలో తరలివచ్చారు. ఆలయ ఈవో వీరేశం భక్తులకు ఎలాంటి ఇబ్బందులు కలగకుండా ఏర్పాట్లు చేశారు.