ఎల్ నినో ప్రభావం: సంగారెడ్డి పండ్ల తోటల రైతులకు బిందు సేద్యం, మల్చింగ్ సూచన

ఎల్ నినో ప్రభావంతో ఈ సంవత్సరం ఉష్ణోగ్రతలు పెరిగాయి. నీటి ఎద్దడి కూడా ఎక్కువగా ఏర్పడింది. ఈ నేపథ్యంలో పండ్ల తోటల రైతులు బిందు సేద్యం, మల్చింగ్ పద్ధతులు పాటించాలని శాస్త్రవేత్తలు సూచిస్తున్నారు.

సంగారెడ్డి జిల్లాలో మామిడి, కూరగాయలు, పూల తోటల సాగు ఎక్కువగా ఉంటుంది. జహీరాబాద్‌లోని TDS కృషి విజ్ఞాన కేంద్రం ఉద్యాన శాస్త్రవేత్త శైలజ ఈ సూచనలు ఇచ్చారు. భూగర్భ జల మట్టం ఇప్పటికే 18 నుంచి 21 మీటర్ల లోతు వరకు తగ్గిపోయింది. కాబట్టి రైతులందరూ అప్రమత్తంగా ఉండాలని ఆమె తెలిపారు.

పసిఫిక్ మహాసముద్రం ఉపరితలంపై వేడి పెరగడం వల్ల వర్షాలు తగ్గిపోతాయి. దీన్నే ఎల్ నినో ప్రభావం అంటారని శైలజ వివరించారు. మామిడిలో ఇప్పుడు పూత, పిందె దశ ఉంది. భూమిలో తేమ లేకపోవడంతో ఒత్తిడి పెరిగి పూత, పిందె రాలిపోతున్నాయి. పూత మొదలైన తర్వాత, గోలీకాయ పరిమాణం వచ్చిన తర్వాత బిందు సేద్యం ద్వారా నీరు ఇవ్వాలి. ప్రతి చెట్టు చుట్టూ బేసిన్ చేసి, వరి గడ్డి లేదా చెరకు ఆకులతో కప్పాలి. దీనివల్ల ఇచ్చిన నీరు వృథా కాకుండా ఉంటుంది.

పండు ఈగ నివారణకు ఎకరానికి 10 ఫెరమోన్ ట్రాప్‌లు తప్పనిసరిగా ఏర్పాటు చేయాలి. దీనివల్ల మగ కీటకం బుట్టలో పడి సంతానోత్పత్తి ఆగిపోతుంది. మామిడిలో మంగు తెగులు ఎక్కువగా మబ్బు వాతావరణంలో వస్తుంది. ఇది ఆకులు, పూతపై జిగట పదార్థాన్ని విసర్జిస్తుంది. దీని నివారణకు గంజి ద్రావణం పిచికారీ చేయాలని శాస్త్రవేత్త సూచించారు.

ఎల్ నినో ప్రభావంతో కూరగాయల ధరలు కూడా పెరిగాయని శైలజ తెలిపారు. తోటల్లో అంతర పంటలు వేసుకోవాలని సూచించారు. సంగారెడ్డి జిల్లాలో కొత్తగా ఆయిల్ పామ్ సాగు ప్రారంభమైంది. అందులోనూ బిందు సేద్యం, మల్చింగ్ పాటించాలి. బొప్పాయి, జామ, దానిమ్మ తోటల రైతులూ మల్చింగ్ చేయాలి. దానిమ్మలో బోరాన్ నేలలో వేసుకుంటే పూత, పిందె రాలడం తగ్గుతుందని ఆమె చెప్పారు.