తెలంగాణ యూనివర్సిటీ హాస్టల్‌లో సీనియర్స్, జూనియర్స్ ఘర్షణ: ఆరుగురిపై కేసు

నిజామాబాద్ జిల్లా దిచ్‌పల్లిలోని తెలంగాణ యూనివర్సిటీ హాస్టల్‌లో ఈ నెల 12 అర్ధరాత్రి సీనియర్, జూనియర్ విద్యార్థుల మధ్య ఘర్షణ జరిగింది. ఈ ఘటనపై పోలీసులు ఆరుగురిపై కేసు నమోదు చేశారు.

ఫార్మాస్యూటికల్ కెమిస్ట్రీ సీనియర్ విద్యార్థి ఒకరు, బయటి నుంచి వచ్చిన ఐదుగురు కలిపి మొత్తం ఆరుగురిపై దిచ్‌పల్లి పోలీసులు కేసు నమోదు చేశారు. బయటి నుంచి వచ్చిన వారిని పోలీసులు అదుపులోకి తీసుకున్నారు.

మాస్కులు ధరించిన గుర్తు తెలియని వ్యక్తులు బైక్‌లపై హాస్టల్‌లోకి చొరబడి జూనియర్ విద్యార్థులపై దాడి చేసినట్టు CCTV ఫుటేజీలో కనిపిస్తోంది. ఈ దాడిలో జూనియర్ విద్యార్థి విష్ణువర్ధన్ తీవ్రంగా గాయపడ్డారు. ఆయనను ఆసుపత్రికి తరలించారు. ప్రస్తుతం ఆయన ఆసుపత్రిలో చికిత్స పొందుతూ కోలుకుంటున్నారు.

విశ్వవిద్యాలయం ఏర్పాటైన దాదాపు 20 ఏళ్లలో విద్యార్థుల మధ్య ఇలాంటి ఘర్షణ నమోదుకాలేదు. గతంలో జరిగిన చిన్న చిన్న మనస్పర్థలే ఈ ఘర్షణకు కారణమని ప్రాథమిక సమాచారం చెబుతోంది.

ఘటనపై విశ్వవిద్యాలయ అధికారులు అత్యవసర సమావేశం ఏర్పాటు చేశారు. బయటి వ్యక్తులు లోపలికి ఎలా వచ్చారు అనే కోణంలో విచారణ చేపట్టామని, ఇలాంటి ఘటనలు మళ్లీ జరగకుండా చర్యలు తీసుకుంటామని వారు తెలిపారు.

భద్రతను కట్టుదిట్టం చేయాలని విద్యార్థి సంఘాలు డిమాండ్ చేస్తున్నాయి. ఘటనపై పోలీసుల దర్యాప్తు కొనసాగుతోంది.