ఎల్లంపల్లి ప్రాజెక్టు నీటిమట్టం 142 మీటర్లకు: నిల్వ 7.7 టీఎంసీలే

శ్రీపాద ఎల్లంపల్లి ప్రాజెక్టులో నీటి నిల్వలు క్షీణిస్తున్నాయి. వర్షాభావం, ఎల్నీనో ప్రభావంతో ఎగువ నుండి నీటి ప్రవాహం లేకపోవడంతో ప్రాజెక్టు నీటిమట్టం 142 మీటర్లకు పడిపోయింది. పూర్తి నీటి నిల్వ సామర్థ్యం 148 మీటర్లు (20.175 టీఎంసీలు) కాగా, ప్రస్తుతం 7.7 టీఎంసీల నీరు మాత్రమే నిల్వ ఉంది.

హైదరాబాద్ మెట్రో వాటర్ సప్లై, ఎన్టీపీసీ, మిషన్ భగీరథ తాగునీరు, సాగునీటి అవసరాలు పూర్తిగా ఈ ప్రాజెక్టుపైనే ఆధారపడి ఉన్నాయి. రోజూ సుమారు 600 క్యూసెక్కుల నీరు ఆవిరి కావడంతో పాటు పైన పేర్కొన్న అవసరాలకు వినియోగమవుతోంది. అధికారుల లెక్కల ప్రకారం, హైదరాబాద్లో తాగునీటి సరఫరా 138 మీటర్ల నీటి మట్టం వరకు మాత్రమే సాధ్యం. ఆ పరిమితి లోపు వాడుకోగలిగే నీటి నిల్వ 3.3 టీఎంసీలు.

ప్రస్తుత వినియోగం లెక్కన ఈ నిల్వతో నగరానికి, ఇతర అవసరాలకు సుమారు 90 రోజుల వరకు నీరు సరఫరా చేయవచ్చని అంచనా. అయితే నీటిమట్టం 134 మీటర్ల డెడ్ స్టోరేజ్ స్థాయికి పడిపోతే నీటి విడుదల సాధ్యం కాదు. ఎల్నీనో ప్రభావంతో ఎగువ ప్రాజెక్టులు ఎస్ఆరెస్పీ, కడెంల నుంచి గాని, క్యాచ్మెంట్ ఏరియా నుంచి గాని నీరు అందే పరిస్థితి లేదు. ప్రస్తుతం ఉన్న నీటిని పొదుపుగా వాడుకోవాల్సిన అవసరముందని అధికారులు హెచ్చరిస్తున్నారు.