ఏలూరు జిల్లాలో సర్పంచ్ అభ్యర్థి ఎంపికకు గ్రామస్థుల మాక్ పోలింగ్

ఏలూరు జిల్లా కొయ్యలగూడెం మండలం దిప్పకాయలపాడు గ్రామ పంచాయతీలో సర్పంచ్ అభ్యర్థిని ఎంపిక చేసేందుకు గ్రామస్థులు మాక్ పోలింగ్ నిర్వహించారు. ఈ పోలింగ్‌ను సాధారణ ఎన్నికల తరహాలో స్వచ్ఛందంగా ఏర్పాటు చేశారు.

గ్రామ పంచాయతీ సర్పంచ్ స్థానం ఎస్సీ రిజర్వేషన్‌కు కేటాయించడంతో ఎస్సీ వర్గానికి చెందిన ఇద్దరు వ్యక్తులు పోటీకి ఆసక్తి చూపారు. వారిలో ఒకరిని ఎంపిక చేయాలని గ్రామస్థులు నిర్ణయించుకున్నారు. ఈ నేపథ్యంలో బ్యాలెట్ పత్రాలను సిద్ధం చేశారు. కాకపర్తి సుబ్బారావుకు మర్రి చెట్టు గుర్తు కేటాయించారు.

ఓటర్లు క్యూ లైన్‌లో నిలబడి తమ వివరాలు నమోదు చేసుకున్నారు. అనంతరం బ్యాలెట్ పత్రంపై తమకు నచ్చిన అభ్యర్థి గుర్తుకు ఓటు వేసి డబ్బాలో వేశారు. పోలింగ్ ముగిసిన తర్వాత ఓట్ల లెక్కింపు చేపట్టారు.

మొత్తం 428 ఓట్లు పోలయ్యాయి. కాకపర్తి సుబ్బారావుకు 307 ఓట్లు, కైకవరపు బాబూరావుకు 121 ఓట్లు వచ్చాయి. మాక్ పోలింగ్‌లో గెలిచిన కాకపర్తి సుబ్బారావును సర్పంచ్ అభ్యర్థిగా నిలబెట్టేందుకు గ్రామస్థులు మద్దతు ప్రకటించారు.

గ్రామస్థుల్లో ఒకరైన పూనపాలం నాగేశ్వరావు మాట్లాడుతూ, ఎస్సీ రిజర్వేషన్ ఉన్న సర్పంచ్ పదవికి ఇద్దరు వ్యక్తులు ఉన్నందున ఓట్ల ఎన్నిక నిర్వహించినట్టు చెప్పారు. గెలిచిన వ్యక్తికి సర్పంచ్ పదవికి మద్దతు ఇస్తామని ఆయన తెలిపారు. గ్రామాభివృద్ధి కోసమే ఈ ఏర్పాటు చేశామని, ఇందులో స్వార్థం లేదని ఆయన పేర్కొన్నారు. ఇద్దరు వ్యక్తులు కూడా గెలిచిన వ్యక్తికి మద్దతు ఇస్తామని అంగీకరించినట్టు ఆయన చెప్పారు.