లలిత్ మోదీకి బ్రిటిష్ పౌరసత్వం: ఆక్స్‌ఫర్డ్ యూనియన్‌లో ప్రకటన

మాజీ IPL చైర్మన్ లలిత్ మోదీ బ్రిటిష్ పౌరసత్వం పొందినట్లు ప్రకటించారు. నవంబర్ 14న ఆక్స్‌ఫర్డ్ యూనియన్ వేదికగా ఆయన ఈ విషయాన్ని బహిరంగంగా వెల్లడించారు.

కుటుంబ సభ్యులు, సన్నిహిత మిత్రుల సమక్షంలో జరిగిన ప్రత్యేక వేడుకలో ఆయన పౌరసత్వాన్ని స్వీకరించారు. కింగ్ చార్లెస్ 3 పుట్టినరోజు సందర్భంగా ఈ విషయాన్ని పంచుకోవడం తనకు ప్రత్యేకమని ఆయన చెప్పారు. గత కొన్నేళ్లుగా బ్రిటన్ తన ఇల్లుగా మారిందని ఆయన పేర్కొన్నారు. ఆ దేశ ప్రజలు, సంస్థలు, సంప్రదాయాలపై తనకు గౌరవం ఉందని తెలిపారు.

లండన్‌లో ఆయన సుమారు 16 ఏళ్లుగా నివసిస్తున్నారు. 2008లో ఆయన IPL ప్రారంభించారు. 2010లో bidding అవకతవకలు, మనీ లాండరింగ్, విదేశీ మారక ద్రవ్య నిర్వహణ చట్టం ఉల్లంఘన ఆరోపణలు ఆయనపై వచ్చాయి. BCCI ఆయనపై చర్య తీసుకుంది. ED దర్యాప్తును ముమ్మరం చేసింది. ఆ ఏడాదే ఆయన భారత్ విడిచి బ్రిటన్ వెళ్లారు.

2025లో ఆయన పసిఫిక్ ద్వీప దేశం వనాటు పౌరసత్వం పొందారు. భారత పాస్‌పోర్టును అప్పగించేందుకు ప్రయత్నించారు. కానీ వనాటు ప్రభుత్వం ఆ పౌరసత్వాన్ని రద్దు చేసింది. దాంతో ఆ ప్రయత్నం ఫలించలేదు. తాజాగా ఆయన నేరుగా బ్రిటిష్ పౌరసత్వం పొందారు.

తాను పరారీలో ఉన్న నేరస్థుడిని కాదని లలిత్ మోదీ చెప్తున్నారు. ఏ కోర్టులోనూ తనపై నేరం రుజువు కాలేదని ఆయన వాదిస్తున్నారు.

బ్రిటిష్ పౌరసత్వం వచ్చినంత మాత్రాన అప్పగింత ఒప్పందం ప్రకారం ఆయనను భారత్‌కు తీసుకురావడానికి చట్టపరమైన అడ్డంకి లేదని న్యాయ నిపుణులు చెప్తున్నారు. అయితే ఇంటర్‌పోల్ రెడ్ కార్నర్ నోటీసు లేకపోవడం సమస్యగా మారింది. బ్రిటిష్ పౌరుడిగా లభించే రక్షణలు, యూకే కోర్టుల సుదీర్ఘ ప్రక్రియలు ఆలస్యం చేస్తాయని వారు అంటున్నారు.

2012 నుంచి ఆయనను భారత్‌కు రప్పించేందుకు కేంద్ర ప్రభుత్వం ప్రయత్నిస్తోంది. ఇప్పటివరకు ఆ ప్రయత్నం సఫలం కాలేదు.