పూణేలో ఇండిగో విమానం అత్యవసర ల్యాండింగ్: 192 మంది ప్రయాణికులు సురక్షితం

గువహాటి వెళ్లే ఇండిగో విమానం టేకాఫ్ అయిన కొద్దిసేపటికే సాంకేతిక సమస్యను ఎదుర్కొంది. దీంతో విమానం తిరిగి పూణే విమానాశ్రయంలో అత్యవసరంగా ల్యాండ్ అయింది.

పూణే నుంచి గువహాటికి వెళ్లే ఈ విమానంలో 192 మంది ఉన్నారు. ఉదయం టేకాఫ్ అయిన తర్వాత ల్యాండింగ్ గేర్ ముడుచుకుపోకపోవడాన్ని పైలట్ గుర్తించారు. సాధారణంగా విమానం గాల్లోకి ఎగిరిన తర్వాత ల్యాండింగ్ గేర్ లోపలికి ముడుచుకుపోతుంది. పైలట్ వెంటనే ATC కి సమాచారం అందించారు. విమానాన్ని తిరిగి పూణే విమానాశ్రయానికి మళ్లించారు.

పైలట్ సమాచారం అందుకున్న పూణే విమానాశ్రయ అధికారులు ముందు జాగ్రత్త చర్యగా హై అలర్ట్ ప్రకటించారు. ల్యాండింగ్ గేర్ పరిస్థితిని నేరుగా పరిశీలించేందుకు పైలట్ విమానాన్ని రన్‌వేపై చాలా తక్కువ ఎత్తులో నడిపారు. తర్వాత ATC గ్రీన్ సిగ్నల్ ఇవ్వడంతో విమానం రన్‌వేపై సురక్షితంగా ల్యాండ్ అయింది.

విమానం పూర్తిగా సురక్షితంగా ఉందని నిర్ధారించుకున్న తర్వాత అధికారులు హై అలర్ట్ నిబంధనలను ఉపసంహరించుకున్నారు. ప్రయాణికులు, సిబ్బంది సహా మొత్తం 192 మంది సురక్షితంగా ఉన్నారని, ఎవరికీ గాయాలు కాలేదని అధికారులు ప్రకటించారు.

ప్రయాణికులను గువహాటికి పంపించేందుకు ఇండిగో సంస్థ బెంగళూరు నుంచి మరో ప్రత్యేక విమానాన్ని ఏర్పాటు చేసింది.