రిటైర్డ్ ఎస్ఐ బెనిఫిట్స్ కేసు: 10% వడ్డీ చెల్లించకపోతే ఆర్థిక శాఖ ప్రత్యేక కార్యదర్శి కోర్టుకు

రిటైర్డ్ ఉద్యోగుల బెనిఫిట్స్‌పై తెలంగాణ హైకోర్టు ఆదేశాలు జారీ చేసింది. బెనిఫిట్స్ చెల్లింపులో జాప్యం జరిగితే 10 శాతం వడ్డీ చెల్లించాలని ప్రభుత్వానికి ఆదేశించింది.

కామారెడ్డిలో 2024 డిసెంబర్ 31న ఎస్ఐగా రిటైర్ అయిన బేతి కోనారెడ్డి బెనిఫిట్స్ రాకపోవడంతో ఫిబ్రవరి 23న హైకోర్టులో పిటిషన్ దాఖలు చేశారు. నాలుగు వారాల్లో బెనిఫిట్స్ చెల్లించాలని, లేకపోతే రిటైర్మెంట్ తేదీ నుంచి 10 శాతం వడ్డీ చెల్లించాలని కోర్టు ఉత్తర్వులు ఇచ్చింది.

అయితే ఆరు వారాలు గడిచినా బెనిఫిట్స్ చెల్లించలేదు. దీంతో కోర్టు ధిక్కరణ పిటిషన్ దాఖలు చేశారు. ఆరు వారాల తర్వాత బెనిఫిట్స్ మాత్రమే చెల్లించారని, వడ్డీ ఇవ్వలేదని ఆరోపించారు.

ఈ కేసు విచారించిన ధర్మాసనం 2-3 నెలలకు 10 శాతం వడ్డీ ఎందుకు చెల్లించలేదని ప్రశ్నించింది. కేసును డిసెంబర్ 4వ తేదీకి వాయిదా వేసింది. ఆలోగా వడ్డీ చెల్లించకపోతే ఆర్థిక శాఖ ప్రత్యేక కార్యదర్శి నేరుగా కోర్టులో హాజరుకావాలని ఆదేశించింది.