నటుడు గిరిబాబు భౌతికకాయం స్వగ్రామం రావినూతలకు తరలింపు

సీనియర్ నటుడు గిరిబాబు హైదరాబాద్‌లోని ప్రైవేట్ ఆసుపత్రిలో చికిత్స పొందుతూ మృతి చెందారు. ఆయన భౌతికకాయాన్ని స్వగ్రామం ప్రకాశం జిల్లా కొరిసపాడు మండలం రావినూతల గ్రామానికి తరలించారు.

గత కొన్ని నెలలుగా అనారోగ్యంతో ఉన్న గిరిబాబు ఆరోగ్యం మూడు రోజుల క్రితం విషమించింది. ఆసుపత్రిలో చికిత్స కొనసాగుతుండగా ఆయన మృతి చెందారు. గ్రామం అంటే తనకు ఎంతో ఇష్టమని, అక్కడే అంత్యక్రియలు చేయాలని ఆయన కోరారు. ఆ కోరిక మేరకు కుటుంబ సభ్యులు భౌతికకాయాన్ని రావినూతలకు తీసుకొచ్చారు. కొద్ది గంటల్లో గ్రామంలోనే అంత్యక్రియలు జరుగుతాయని కుమారుడు, నటుడు రఘుబాబు తెలిపారు.

దాదాపు 50 ఏళ్ల సినీ ప్రస్థానంలో గిరిబాబు 650 చిత్రాల్లో నటించారు. హీరో, విలన్, కామెడియన్, కామెడీ విలన్, పాజిటివ్ పాత్రలు ఆయన చేశారు. ఎన్‌టీఆర్ నుంచి నేటి యువ కథానాయకుల వరకు ఆయన నటించారు.

నిర్మాత, దర్శకుడు, ఎడిటర్‌గా కూడా పనిచేశారు. సుమారు 10 నుంచి 15 సినిమాలను నిర్మించారు. దేవతలారా దీవించండి, సింహ గర్జన, మెరుపుదాడి చిత్రాలు విజయవంతమయ్యాయని రఘుబాబు చెప్పారు. తన కుమారులు బోస్ బాబు, రఘుబాబును సినీ పరిశ్రమకు పరిచయం చేశారు. రఘుబాబు సుమారు 400 సినిమాల్లో నటించారని ఆయన తెలిపారు.

తండ్రి వివాదాలకు దూరంగా ఉండేవారని, అందరితో సామరస్యంగా ఉండేవారని రఘుబాబు గుర్తు చేసుకున్నారు. సినిమాల్లోకి రాకముందు దాదాపు 20 ఏళ్లు గ్రామంలోనే గడిపారని, నాటకాలంటే ఆయనకు ఎంతో ఇష్టమని ఆయన చెప్పారు.