300 గొర్రెలతో 4 నెలల్లో రూ.10 లక్షల లాభం: సత్యసాయి రైతు సాఫల్య గాథ

సత్యసాయి జిల్లా కొత్తచెరువు మండలం కమ్మవారిపల్లెకు చెందిన రైతు నారాయణస్వామి వ్యవసాయంతో పాటు గొర్రెల పెంపకాన్ని చేపట్టి మంచి లాభాలు ఆర్జిస్తున్నారు. ఆయన 20 ఎకరాల్లో వేరుశెనగ, మొక్కజొన్న, నేపియర్ గడ్డి సాగు చేస్తూ పంట వ్యర్థాలను గొర్రెలకు మేతగా వాడుతూ మేత ఖర్చు తగ్గించుకుంటున్నారు.

ప్రతి బ్యాచ్‌లో 300 గొర్రెలను 4 నెలలు పెంచి విక్రయిస్తారు. చిన్న గొర్రెపిల్లలను స్థానిక సంతల నుండి రూ.5,000-6,000 చొప్పున కొనుగోలు చేసి, 20 కేజీల నుండి 50-60 కేజీల బరువు పెరిగాక రూ.16,000-17,000 వరకు అమ్ముతారు. దీంతో ప్రతి బ్యాచ్‌కు రూ.8-10 లక్షల లాభం వస్తోంది.

బెంగళూరులో ఓ చిన్న గొర్రెల ఫారం చూసిన తర్వాత నారాయణస్వామి ఈ వ్యాపారం మొదలుపెట్టారు. సుమారు రూ.30 లక్షల పెట్టుబడితో వెంటిలేటెడ్ షెడ్ నిర్మించారు. శాస్త్రీయ పద్ధతులతో వ్యాక్సినేషన్ చేయిస్తూ, విజయవాడ, హైదరాబాద్, బెంగళూరు మార్కెట్లకు సరఫరా చేస్తున్నారు. మాంసానికి డిమాండ్ ఎప్పుడూ ఉండడంతో ఇది నష్టం లేని వ్యాపారమని ఆయన అంటున్నారు.